空中喱民
空中喱民係香港商業電台第二台叱咤903嘅電台節目。節目喺2005年1月17號首播，並響2007年2月23號做完最後一集。節目名取自兩位節目主持人張家豐（阿喱，Nath）同埋詹志民（Leo）嘅「喱」字同埋「民」字。《空中喱民》係一個娛樂節目，節目時間為逢星期一至五，晚上八點至十點。
節目特色
[編輯]- 主持人經常誇張噉推崇MK文化（MK=Mong Kok，即香港嘅旺角）。
- 操作員「豪子」亦經常參與遊戲或討論，響傳統嘅電台節目度唔係太常見。
- 節目設有網上留言板[1]，畀聽眾同網友發言，有陣時響做響節目嗰陣主持人會作即時回應。
- 由於主持人，特別係詹志民嘅發音經常唔準，響佢哋每次走音或者躂音嗰陣，豪子就會響起「喪鐘」嘅聲音，而主持人之後必須即時講出「對唔住，我躂音」或「對唔住，我走音」向廣大聽眾道歉，如果佢哋好明顯地走音或撻音但豪子唔會響起「喪鐘」，豪子就須要向廣大聽眾講出「對唔住，我撻Q」。主持人自稱呢個係佢哋作為檢討嘅機制。呢啲係幫個節目增添娛樂性，亦開拓廣播界嘅先河。
- 近陫，佢哋會因應唔同嘅主持人而改變節目名。例如請Sun Boy'z代替詹志民，節目名會改做《空中喱士》。
節目環節
[編輯]天氣報告
[編輯]由於履行廣播節目嘅職責，響商業二台嘅每一個節目，每隔半小時會有一段天氣報告。響《空中喱民》節目最初嘅五個月之中，一直為細細粒讀出「空中喱民 最新天氣預報」之後，由主持人報道天氣預測。之後，主持人聲稱「需要延續前一個節目《好回家》嘅音樂格調」，由2005年6月開始，改用古典音樂做背景音樂報道天氣。響《903發開口夢》返來後，古典音樂背景仍然持續一段小時間。其後主持人鑑於網上新聞組度，有太多人認為古典音樂「無助提升節目格調」，響2005年9月中起，更改背景音樂做響網上流行嘅血腥短片《開心樹朋友》嘅主題音樂，並一直沿用至而家。
神鵰大俠教你寫大字
[編輯]神鵰大俠教你寫大字係每日節目嘅第一個環節，環節起源於兩位主持人對香港著名歌手同演員劉德華同埋佢曾經飾演神鵰大俠嘅敬仰，更常尊稱佢做「劉華大帝」。環節開始嗰陣亦都用咗由劉德華主唱嘅南音歌曲《神鵰大俠》作起首，不過每次都唔會播放全首歌曲，一般只係半分鐘左右。響環節裏面，主持人會代神鵰大俠教聽眾寫一個字同解釋點解當日會教呢個字，但節目與神鵰大俠並無直接關係。
大佬冰室
[編輯]大佬冰室是節目中一套胡鬧嘅廣播劇，每集都有一個主題。劇本由詹志民寫，由兩位主持人飾演「豹膽民」同「老虎喱」，兩人都非常好色，只關心「囡囡」同埋具嚴重暴力傾向，每集結束後都會有人(極大部份為豹膽民)被「做低」或「隊冧」，每集劇尾之後，都會有豪子飾演嘅「豪爺」出場，對當日嘅主題或劇中嘅內容作出回應，而豪爺嘅成名作「我直入元朗」亦都係因為咁而誕生。節目中重有「阿公」、「細細粒」、「浩南」等曾經響香港江湖電影《古惑仔》系列出現嘅角色，不過出場唔多，有陣時如果嘉賓嗰陣亦會邀請佢加入呢個短劇演出之中。而兩位主持人敬仰嘅劉德華（「劉華大帝」）更曾經響2006年4月21號一集客串演出。
嘟嘟大估東
[編輯]嘟嘟大估東係一個遊戲環節。每日由一位主持人講出佢身邊嘅有趣對話或句子，以嘟取代要估嘅字，但保留音調，而另一位主持人、操作員豪子或聽眾負責估答案。
牛頭唔答馬面
[編輯]由廣播劇戀愛樂園完結之後出現。兩位主持係呢個環節嘅參賽者，並化名做「牛頭喱」同「馬面民」。裁判由控制員豪子擔任，佢亦都會化名做「閻羅王」，佢嘅聲音會經過特別處理，以求驚嚇同埋有威嚴嘅效果，但普遍不果，反而成為咗一個笑位。
玩法同今日好波枚好相似，但係牛頭同馬面要問對方有關由豪子提出嘅地點嘅問題，但兩條問題之間無需有關。例子：（茶餐廳）「牛頭牛頭，有冇飯食？」「馬面馬面，有冇牛河食？」
由詹志民參與森美小儀歌劇團Big Nose嘅演出之前排練嗰陣，阿喱請來Don & Mandy（李逸朗同蔣雅文）擔任節目主持人。由於李逸朗實力太強，阿喱就訂下每句問題唔可以超越10字嘅規則，令難度加強。但係詹志民回歸之後，甫參與呢個遊戲嘅加強版，非常不滿呢項規則，從此呢個規則就取消咗。
詹志民曾經有一晚連續兩Round都未問過問題就勝出呢個環節。相信係因為嗰晚嘅問題--酒吧，挑動咗另一位參賽者--阿喱好酒同經常蒲吧嘅神經。阿喱兩Round都大喝一句命令，落得慘敗。
今日點嗌
[編輯]呢個環節出現嘅目的係要罰響之前嘅遊戲環節(即之前嘅《今日好波》同現時嘅《牛頭唔答馬面》) 中嘅落敗者。呢個環節更號稱做廣播史上第一個點主持人嗌嘅節目。點人嗌者可以點人嗌開心同不開心嘅事，並要創作一句金句，但大多數兩位主持人都唔會接受。
響《今日好波》年代，負責人要步上商台天台，為聽眾嗌出「不朽香江名句」。
《牛頭唔答馬面》年代，負責人要步入903直播室旁邊嘅廁所馬桶中大嗌，然後沖水。
有一晚，因為豪子放假，改為由陳強擔任牛頭唔答馬面嘅裁判，但係佢不夠決斷嘅性格使兩個人未能分出勝負。為令到呢個環節順暢進行，第一次由非牛頭唔答馬面參賽者（即陳強）成為今日點嗌嘅負責人。最後，佢亦因為電話接收得唔清楚，使此半個鐘頭首次出現爛尾。
2006年9月25日，因為詹志民參與Subaru Time Challenge 森美移動鐵人耐力賽後非常之攰，阿喱做咗關心拍檔，代為點嗌。
喱民狗仔隊
[編輯]當節目中有嘉賓或嘉賓主持(當其中一位主持放假時或離開香港工作時會有)，節目環節中主持人會問嘉賓或嘉賓主持當日做過些乜嘢或者平時做過些乜嘢係有關當日主題嘅事，由於空中喱民好少有嘉賓，所以呢個節目好少出現呢個環節。
前度環節
[編輯]空中喱民網上新聞組報導
[編輯]節目啟播初期，兩位主持人會響節目讀出留言板上嘅熱談題目，然後將發出嘅Post嘲笑一番。
民意大飲茶
[編輯]與上面嘅好接近，不過今次講嘅題目係主持人佢哋自己放上網畀人討論。
以上兩者都係不定時播出，以收攝時間之用。
兩個大雄
[編輯]兩個大雄係借動漫角色大雄對多啦A夢視若神明嘅關係因而以多啦A夢作為禱告嘅對象，一個兩位主持人自訴心聲嘅環節（有時候亦會有為phone-in聽眾嘅「禱告」）。響節目中，每日都會響呢個環節向「全能嘅多啦A夢」作「禱告」，好似Blog、日誌或日記一樣每日講到生活中嘅不同話題，並以節目口號「SHU-BALI-BOM-BOM」作結尾，可以話係《空中喱民》中較為正經嘅一個環節。
旺角奇幻潮
[編輯]旺角奇幻潮係由兩位主持人扮演「潮人」「旺角大寶」同「旺角文輝」，講講潮人應該同不應該做嘅事。其中旺角大寶一角脾氣非常暴躁，旺角文輝一角就鍾意押韻，基本上冇一句唔押韻。響環節結束之前，總係有人會激嬲大寶，大寶破口大鬧之後以一段Mixing作結。
呢個環節初期係喺21:00至21:30中播出，而家推遲咗到至21:30後播出，可以話係壓軸環節。
追思會
[編輯]節目啟播初期，節目開始時嘅環節，兩位主持人會以非常虛偽嘅演技扮成做某件事而哭喪。一邊「喊」，一邊講佢哋嗰日遇到嘅一件值得傷心嘅事。呢個環節一直出現至對聯會出現為止。
對聯會
[編輯]嘅個環節出現嘅理由係因為某日他們響節目對過聯，佢哋食髓知味，繼續玩呢個遊戲。
呢個環節出現之後，追思會就完結咗。呢個對聯會曾經響播主題曲之前出現，後來改於主題曲出現之後播出。
規則係有一個大題目，然後有上聯，下聯必定要押韻，內容要同佢嘅主題有關。
108 個好人逼上九零山
[編輯]響節目啟播初期播出，志在鼓勵香港人做好人，每晚接聽兩位聽眾嘅好人好事，然後其他聽眾會投票選出勝出者，勝出者可獲主持人嘅相又或係是其他冇用嘅物件。
佢哋響呢個環節中經常強調佢哋會響稍後（2005年暑假）搞大壇，但隨住好人嘅數目接近108位，環節就結束咗，大壇都不了了之。
呢個環節通常響21:30之後播出。
空中喱民告別麻甩Be my love
[編輯]其中一個最令人毛管直豎嘅環節之一，兩位主持人會化名做Man豬同喱豬，用陰聲細氣嘅語調解決少女嘅問題。
呢個環節最初出現嘅目的係為咗減低節目嘅麻甩度同增加女聽眾嘅收聽率，但最後都唔能夠減低節目嘅麻甩度。
呢個環節會「邀請」電台Operator豪子唱出一段好高音嘅歌詞。據聞，噉做嘅目的係有見於豪子嘅聲音好低沉，好麻甩，所以諗住藉住唱高音歌來扯高佢嘅聲線。
旺角絕情谷
[編輯]旺角絕情谷總共有32集，帶畀聽眾知道呢個環節「名抄」一深夜愛情節目《絕情谷》，開始嗰陣由阿喱演「大煲」（大JOE），詹志民演聽眾；幾集後分做兩個部份，第一部份由阿喱演「大煲」，詹志民演聽眾；第二部份由阿喱演「大煲」，詹志民演「細煲」（細JOE）。開始嗰陣同第一部份主持人詹志民演聽眾嘅一位問一啲聽眾成日問到嘅愛情問題，由主持人阿喱演“大煲”嘅一位以搞笑嘅方法回答，第二部份由阿喱演嘅「大煲」，詹志民演嘅「細煲」講出一啲MK仔對愛情嘅一啲資料搜集。
喱民音樂之神 John Len龍
[編輯]2005年8月，喱民二人主持《903發開口夢》選拔新人，
其中一位選手stevenlung（化名John Len龍）至最後奪得第三名落敗。
雖然落敗，但佢熱愛世界音樂嘅熱誠獲得喱民嘅看重；
9月5日喱民回歸之後，響節目最後嘅幾分鐘，為John Len龍開設咗音樂環節，
稱為「喱民音樂之神 John Len龍」。
每日節目尾聲之際，開出以約翰連儂首本名曲做背景，由控制員毫子讀出嘅一段。
「網上有人傳佢仲在生，亦有人話佢鍾意響橋底逛。
佢錢唔多，囡囡唔多，買碟買到傻鬼左；一生既志願係Make Love, No War, 同聽下歌。
有請我地喱民音樂之神 John Len龍 上身~」
主持人將以電話接入佢嘅聲音，由John Len龍介紹每晚嘅音樂推介。
雖然係咁，但呢個環節成日因John Len龍嘅工作關係或電話接收不濟而停播。
至2005年11月7日，因為面臨節目內容革新嘅關係，
「音樂之神 John Len龍」終為旺角奇幻潮附屬環節「達人西密碼」取代。
二十世紀億萬少年
[編輯]2005年九月初，喱民二人啱啱主持《903發開口夢》節目完畢，重歸直播室，於是為久違嘅節目內容進行咗一次大革新。
由於喱民兩人堪稱出身「富貴」（阿喱家父為燒臘舖東主，而詹志民家母現為一車仔麵館負責人），於是利用自己嘅身份，引用著名漫畫《二十世紀少年》嘅名，衍生出《二十世紀億萬少年》。
主持人每日都會提出自己響生活上遇上嘅一個煩惱，將佢加以醜化，成為一個「食飽飯之煩惱」；當兩位主持人講出自己對呢項煩惱嘅意見後，就會開出一個絕難接受嘅「食飽飯之終極煩惱」。
招請各大聽眾開出一個要求款項或待遇以補償煩惱帶來嘅損失。
主持人綜合各意見後，就會將最多人選擇嘅條件列做「大眾價」，將呢項同「終極煩惱」嘅代價，劃上等號。
而現有節目環節「嘟嘟大估東」亦都係由呢個節目伸展嘅。
註：2005年9月13號晚嘅環節中，兩位主持提出「在臉上紋上字句」等煩惱嗰陣，提及到響臉上紋上「我愛草蜢」以表示對樂隊草蜢三子嘅喜愛；咁啱草蜢啱啱響隔離錄音室工作完畢經過，於是未聽完就即刻闖入直播室，加入討論戰團。
今日好波枚
[編輯]專為2006年世界盃而創嘅臨時節目環節。每Round會由球證（球證由控制員豪子擔任）提出一個「字」，兩位主持要就嗰一Round嘅「字」即時聯想有關該字嘅詞語（同嗰個「字」讀音相同卜中亦可以，但動詞就當輸），響限時之內講出來，以三盤兩勝制進行遊戲，輸嘅一邊要盛讚另一邊一分鐘，盛讚期間唔容許有dead air嘅情況出現。
後來，輸方唔使再響on air時盛讚對方，改而成為《今日點嗌》嘅代表。
呢個環節於廣播劇戀愛樂園推出之後正式取消。