竹棚
竹棚（又稱築棚，英文：bamboo scaffolding）係廣泛應用於中國南亞東南亞非洲嘅傳統建築工藝，集工程學與力學於一身，用到好多枝竹昇响建築物外圍搭起一個棚架（呢個動作叫搭棚），方便畀建築工人爬上去做嘢。
細至個別單位搭棚更換冷氣機、整招牌；大至配搭塑膠防塵幕黎進行外牆維修或翻新工程、建築工程入面用竹縱橫交錯建構成工人嘅工作平台。尤其以「懸空搭棚」技術最西利，喺外國人眼中簡直好似鬼斧神工一樣，呢種工藝喺香港仍然好普遍。
史
[編輯]以竹黎去搭棚嘅建築技術源自400幾年前嘅廣東吳川[1]，亦有指係相傳在五千多年前，有巢氏便是用竹棚建築第一間「樹屋」[2]。而自古就有用竹枝搭製臨時平台嘅標準，似北宋崇寧二年（1103年）朝廷頒佈嘅第一個建築工程指引《營造法式》，其中有「竹作制度」專節（卷十二），規範咗竹笆、竹柵啲工藝要求。到明嘉靖十四年（1535年）《廣東通志初稿．卷十八．時節》載「上元作燈市，采松竹於通街結棚，結華燈于其上」，可知當其時廣東地區元宵節就用啲竹棚去掛燈飾。到康熙年間（17世紀晚期）吳震方《嶺南雜記．卷二》亦有寫到喺高州地區「元宵城南燈市甚盛，每隔五家縛一燈棚，以竹為之」。[3]
廣東啲搭棚亦比較早出現，以承接搭棚工程嘅商號棚廠出現嚟計，搭棚業由搭建遮風擋雨嘅實用建築轉變做本土嘅建造藝術，都存在咗四五百年[4] 。吳川梅菉嘅搭棚業就有400幾年歷史，出名係結構嚴密、綁紮牢靠、承受重壓、堅固耐用、造型美觀，尤其係高層搭棚仲好有聲譽。梅菉搭棚工藝喺粵西試過係獨佔鰲頭，喺廣州等地亦享有盛名。 喺1920-30年代廣州度最出名嘅陳祥記搭棚公司，就有梅菉嘅搭棚師傅坐鎮[5]。喺中華民國初期為咗歡迎孫中山同港督，喺廣州市內交通要道都會搵棚工搭返啲牌樓，以示禮儀之隆重，老一脫棚工就叫呢種彩牌樓做歡迎棚。1920年港督司徒拔訪問廣東省城嗰陣見到本地搭建嘅彩牌樓，試過咁讚：「中國有兩個先生，一個係做象牙嘅，一個係做牌樓嘅。」[6]當其時啲廣州牌樓造型新穎，棚面美麗，喺大中華中較突出同富有藝術。到文革後嘅廣州除咗排棚、腳手架，經已好難見到有彩樓，連大年初一亦冇再有傳統嘅煙花樓（或塔）。
廣州嘅搭棚業行會就源自順德縣灘頭、上海村分支，經過300幾年到清末民初嗰陣得返300幾人[7]。廣東搭棚行業嘅舊日格局，主要集中喺省城廣州、古鎮佛山、順德陳村、逢簡、東莞石龍仲有香港、澳門氹仔等地， 都係舊時啲交通便利， 手工業同商業發達嘅地頭。
不過搭棚藝術始終係由香港開始揚威海外，成為香港文化風景嘅一部份。由6、70年代，香港經濟起飛，需要平靚正嘅方法去起大廈，用竹比起用鋁合金條或者鋼管平好多，仲可以循環再用，竹又富有彈性、又夠堅韌，有相當高嘅可塑性，搭棚師傅可以按需要即場快速切割同組裝成不同形狀，因地制宜，唔洗好似金屬搭棚咁要事前做足量度，久而久之，香港建築商通常都會揀用竹搭棚[8]。
除左香港，搭棚係澳門、中國都有發展，不過用料同技術都有啲出入。而搭棚業喺澳門都有長久歷史，並獲列入澳門非物質文化遺產[9]。
形式
[編輯]
傳統竹棚經常用黎做臨時建構物，例如做大戲用嘅戲棚，用作宣傳嘅紋綁樓子和彩樓歡門。棚架嘅直杆或立杆行內稱為「針」，橫杆稱為「軒」或「牽」，而斜杆或斜撐則稱為「倡」，最初用竹笏捆綁固定，現時已全部採用尼龍篾。在香港常見嘅棚架分三類：
- 雙行竹棚架：距離樓宇外牆表面約莫200至250毫米嘅內棚稱為「批盪架」，而距離內棚約600毫米嘅外棚則稱為「排柵」，工作平台就set 喺內棚與外棚之間，高度超過15米嘅竹棚架就必須由設計工程師設計；
- 外伸桁架式竹棚架：俗稱「懸空棚」或「吊棚」，高度一般少過6米，屬於簡單工作用途嘅竹棚架，多數用黎修理外牆排水管；
- 招牌竹棚架：通常屬懸臂式結構，跨度不超過5米，而長度同高度嘅比例上限係4:3，用黎安裝同維修廣告招牌。
而戲棚一類嘅立體棚架是由上述棚架嘅基本搭建方式演變而成。
香港工業指引
[編輯]屋宇署《竹棚架設計及搭建指引[10]》及勞工處《竹棚架工作安全守則[11]》
呢個只係業界指引但冇法律約束力
- 斜柵及其承托須由專業工程師設計
- 棚架面須覆蓋具阻燃特性嘅保護網
相關新聞
[編輯]聲音
[編輯]搭棚工作始終危險又辛苦，好少新人肯入行，呢種搭棚技術愈黎愈少人學得到，再加上市場好多聲音質疑竹棚係火災上具有危險性，加上2025年11月26日發生既宏福苑大火後，香港政府亦宣布商討以金屬棚架取代竹棚架[13]，所以香港嘅搭棚文化有機會喺未來會買少見少。
不過，英國等地方唔係用竹棚去做工程，同樣都引發過火災，例如2017年倫敦西區Grenfell Tower 火災[14]，2024年倫敦東Spectrum Building（Dagenham）火災[15]， 2018年澳洲悉尼Surry Hills 火災[16]，依啲都係因為建築物用左唔安全嘅覆層材料而引起嘅火災。
參考
[編輯]- ↑ 〈引以為傲/搭竹棚起樓 香港特色建築文化 - 大公報〉。《大公文匯 www.tkww.hk》。喺2025-11-26搵到。
- ↑ 〈《香港事‧情》香港獨有的風景-搭棚技術〉。www.thinkhk.com。喺2025-11-26搵到。
- ↑ 黃文輝 清代澳門的搭棚業 澳門雜誌 156期 澳門特別行政區政府新聞局 NEWS GOV-MO
- ↑ 三百载竹圩削蔑声渐稀 麦凤庄 2007-12-22 佛山日报
- ↑ 粤西建筑一绝——梅菉搭棚工艺 互聯網檔案館嘅歸檔，歸檔日期2018年3月4號，. 广州图书馆 2008-04-18
- ↑ 民国广州的彩棚与棚工 互聯網檔案館嘅歸檔，歸檔日期2019年6月7號，. 2014-01-26
- ↑ 广州搭棚业 互聯網檔案館嘅歸檔，歸檔日期2018年3月4號，. 梁源口述；陈国康；霍家荣执笔 广州文史
- ↑ 〈搭棚技術建摩天大廈 讓外國人驚歎的香港文化 | 飛凡香港 | 樂活灣區〉。《當代中國》。喺2025-11-26搵到。
- ↑ 〈搭棚工藝-非物質文化遺產-澳門文化遺產網〉。www.culturalheritage.mo。喺2025-11-26搵到。
- ↑ "6.15". 《竹棚架設計及搭建指引》 (PDF) (2025年4月修訂版)。屋宇署。頁 18。
- ↑ 〈4.4.4 設置斜柵和保護幕〉. 《竹棚架工作安全守則》 (PDF) (第5版)。勞工處職業安全及健康部。2024年4月。頁 17。
- ↑ 〈NEWS GOV-MO: 清代澳門的搭棚業〉。NEWS GOV-MO (繁體中文)。喺2025-11-26搵到。
- ↑ 〈宏福苑五級火｜外牆竹棚包圍疑致火勢蔓延 李家超：正商討以金屬棚架取代竹棚架〉。《大公文匯網》 (中文)。喺2025-11-27搵到。
- ↑ Stylianou, Nick; producer, Sky News. "Dagenham fire: Tower block that went up in flames was in the middle of having cladding replaced". Sky News (英文). 喺2025-11-27搵到.
- ↑ "Barking and Dagenham Council sets up fundraising page after fire". Inside Housing (英文). 喺2025-11-27搵到.
- ↑ Newsdesk, Scaffmag (2018-06-01). "Scaffolding catches fire after it was erected to remove fire risk cladding in Sydney". Scaffmag - Scaffolding News & Jobs (英國英文). 喺2025-11-27搵到.
.jpg){kind=small}