笞刑（粵拼：ci1 jing4，英文：caning），亦叫打藤、鞭刑，搞笑啲講做藤條燜豬肉，係一種沿用咗好耐嘅刑罰執行方式。執行者用竹或者藤製成嘅鞭嚟打人，通常係打籮柚或者背脊，往往都會導致皮開肉裂。鞭笞唔單止用嚟做國家刑罰，有時亦會喺家庭同學校發生，主要用嚟打手掌心或者籮柚，殘酷程度通常低過國家刑罰。
由於呢種刑罰普遍畀國際組織覺得對受刑人唔人道同侵犯人權，所以呢種刑罰喺世界上多數地區已經廢除。依家仲有大約16個國家實施類似笞刑，大部份喺亞洲同非洲（多數實行伊斯蘭教法），例如新加坡、汶萊、馬來西亞、阿富汗、伊朗、坦桑尼亞、波札那、尼日利亞等。
