糧船灣超級火山
| 糧船灣超級火山 | |
|---|---|
糧船灣超級火山[1]（英文：High Island Supervolcano[2]）喺香港新界西貢區糧船灣伸到果洲群島一帶，山體向東傾斜約莫30度，直徑有18公里，係香港以至成個中國東南部第一座被發現嘅古代超級火山。依家喺一座死火山，位置幾乎包嗮中國香港世界地質公園西貢東部嘅火山岩區，依家多數火山岩已經被風化侵蝕，得番尐殘餘[3]，而且座火山大部分都喺海平面之下[4]。
結構[編輯]
呢座死火山上面個部分係火山岩，由糧船灣伸到果洲群島，幾乎包嗮西貢東部地質公園入面大塊土地。火山口響糧船灣一帶，當時岩漿嚟自九龍半島同港島北部，岩漿通過幾條通道向東輸送，穿過馬鞍山同將軍澳[5]。座火山上次爆已經係1億4千萬年前嘅事，噴出約莫1萬3千億立方米嘅火山灰，尐灰冷卻凝固之後，變成一轆轆六角石柱。火山嘅深層部喺花崗岩，由淺入深噉由西貢向九龍同香港島伸開去[6][7][8][9]。土木工程拓展署已經喺嗰度採樣，然後交畀外國相關機構化驗測年[4]。
史[編輯]
土木工程拓展署話，喺1億幾年前，香港同成個華南東部都係位於火山帶。經過拓展署多年嘅地質調查發現，喺2012年確認糧船灣伸延到果洲群島一帶曾經有一座超級火山，叫做糧船灣超級火山[3][5][10][11]。土木工程拓展署為咗呢嗰發現寫咗篇文，並喺2012年1月美國地球物理期刊《Geochemistry, Geophysics, Geosystem》入面[6] 發表[12]。
火山爆發[編輯]
糧船灣超級火山上次爆係1億4千萬年前嘅事，火山爆發嗰陣，幾百立方千米嘅高矽質岩漿從地殼淺層嘅岩漿庫涌出，同時間造成附近幾公里嘅地殼下陷而呈現出盆地地形，形成一個破火山口（破火山口指嘅係因為冇咗岩漿支撐而崩塌咗嘅火山口）。當時噴出約莫1萬3千億立方米嘅火山灰，尐灰凍咗凝（king4）埋之後，變成依家可以喺糧船灣、果洲群島度見到嘅六角石柱。
超級火山指嘅係可以引發極大規模爆發嘅火山，係以火山嘅噴發量嚟計嘅，當時糧船灣超級火山爆發，爆發指數（VEI）係最高嘅八級，噴出約莫一千立方公里嘅岩漿。以爆發指數嚟計，糧船灣超級火山當年爆發嘅威力係2011年5月冰島格里姆火山爆發嘅一萬倍。
世界自然遺產資格[編輯]
糧船灣超級火山嘅獨特地形，有助科學家解開現時歐亞板塊同菲律賓板塊移動過程中嘅一尐謎團，成座超級火山遺址都有資格申請做世界自然遺產，佢嘅科學研究價值能夠幫助科學家了解地球嘅演變過程。
糧船灣超級火山完全符合申請資格，不過就要將世界地質公園範圍由陸地擴大一倍到海面，以保護成座火山遺址[13]。
參考[編輯]
- ↑ 香港發現古代超級火山《香港政府新聞網》 2012年08月30號
- ↑ Ancient supervolcano discovered 互聯網檔案館嘅歸檔，歸檔日期2012年9月5號，., news.gov.hk. August 30, 2012
- ↑ 3.0 3.1 香港發現古代超級火山 《明報》 2012年8月30號
- ↑ 4.0 4.1 香港有座超級火山《東方日報》 2012年8月28號
- ↑ 5.0 5.1 西貢糧船灣曾是火山口 《now.com新聞》 2012年8月30號
- ↑ 6.0 6.1 Sewell, R; Tang, D; Campbell, S (2012-01-12), "Volcanic-plutonic connections in a tilted nested caldera complex in Hong Kong", Geochemistry Geophysics Geosystem, 13, doi:10.1029/2011GC003865, （原先內容喺2012-07-07歸檔）, 喺2012-08-28搵到
- ↑ 糧船灣發現古代超級火山 《香港電台》 2012年8月30號
- ↑ 西貢東部發現古代超級火山
- ↑ 港九多處花崗岩形成與古代超級火山爆發有關
- ↑ 糧船灣超級火山再爆機會微 《東方日報》 2012年8月31號
- ↑ 最後一次爆發1.4億萬年前 「超級火山」助地質研究 《星島日報》 2012年8月31號
- ↑ 糧船灣發現古代超級火山 《星島日報》 2012年8月28號
- ↑ http://www.cvn9898.com/GangAo/2012-08/146573.htm[失咗效嘅鏈] 香港或可申請世遺糧船灣發現古代超級火山
出面網頁[編輯]
- 港超級火山 疑恐龍滅絕元兇 《東方日報》 2012年9月18號
