約翰福健

約翰福健
姓名原文	Ιωάννης Φωκιανός
出生日	1845年12月18號
出生地	雅典
死亡日	1896年
死亡地	雅典
死因	運動創傷
國籍	希臘
識嘅語言	希臘文
母校	雅典大學
職業	體操運動員
[改維基數據]

  提示：呢篇文講嘅唔係約翰福音。

約翰福健（希臘文：Ιωάννης Φωκιανός、英文：Ioannis Fokianos，1845年12月18號—1896年）係一個希臘體操運動員、體育教育家、體育比賽搞手。

生平

約翰福健1845年喺雅典出世，祖籍小亞細亞，係十二兄弟姊妹之一。佢個家族本來姓「俄花洛魯」（希臘文：Oρφάνογλους, Orfaloglous），而佢常用嘅姓嚟自佢老豆鄉下個名「新福佳」（希臘文：Nέα Φωκαία, Nea Fokaia）。

1860年代，福健喺雅典大學讀數學同物理，之後喺雅典公共體育館做助理。1868年，佢紥職做館長，並跟德國體育學派嘅風格喺雅典推廣體操運動。1875年，佢以體育館館長身份主辦第三屆扎帕奧運會。因為呢屆扎帕奧運會負評如潮，福健辭任雅典體育館館長，搬去帖薩羅尼迦嗰度嘅希臘人學校教體育。

1879年，福健返去雅典，响1878年新起好嘅中央體育館出任館長；中央體育館後來改名做「福健國家體育館」嚟多謝福健對希臘體育界嘅貢獻。福健返到雅典之後，成功爭取希臘所有公立學校喺1880年起將體操列為必修科目。

1888至1889年，福健主辦咗第四屆扎帕奧運會。之後佢做咗泛希臘體操會（Πανελλήνιος Γυμναστικός Σύλλογος）嘅創會會長，由1891年做到1896年。1896年，第一屆現代奧運喺雅典舉行，福健冇份主辦，佢讓咗路畀新一代運動員做搞手。

1896年雅典奧運散場之後幾個禮拜，福健喺訓練期間重傷，及後傷重不治。

風格

作為一個體操運動員同埋體育教育家，福健認為體操喺體能競技入面好重要。第三、四屆扎帕奧運會有體操項目，都係因為福健嘅努力。亦因為佢推廣，希臘嘅公立學校先要學體操。

福健同年輕一輩體操選手咬唔啱牙。福健將德國式體操引入希臘；黑呂沙菲（Ιωάννης Χρυσάφης, Ioannis Chrysafis）等等年輕一輩選手鍾意瑞典式體操多啲。另外，福健認為體操係上流社會嘅運動，但後生一輩體操選手認為體操應該係全民運動。1875年嘅扎帕奧運會，福健淨係俾有讀過大學嘅選手參賽，呢件事係嗰屆運動會好多負評嘅原因之一。不過，兩代希臘體育家都認為體操應該係廣泛參賽而唔係齋爭第一，所以1896年奧運之前嘅體操比賽係冇記錄個別選手嘅表現評分嘅。

致敬

雅典市嘅「福健國家體育館」（希臘文：Εθνικό Γυμναστήριο Αθηνών «Ι. Φωκιανός»），體育館入面嘅「福健體育博物館」（希臘文：Αθλητικό Μουσείο «Ι. Φωκιανός»），同埋體育館附近嘅「福健街」（希臘文：Οδός Φωκιανού, Odos Fokianou）都係為紀念約翰福健而命名嘅。