約翰連儂

出自維基百科,自由嘅百科全書
跳去: 定向搵嘢
約翰連儂

約翰連儂John Lennon1940年10月9號1980年12月8號),英國利物浦出世,披頭四結他手同埋主音歌手,披頭四嘅歌大部份都係佢同保羅麥卡尼作嘅。

連儂喺利物浦出世長大,喺青少年時期參加咗噪音爵士樂熱潮;佢嘅第一支樂團「採石工人」(the Quarrymen)喺1956年組成,1960年改叫披頭四。披頭四1970年解散後,佢開始咗自己嘅個人職業生涯,發行咗受好評嘅專輯《John Lennon/Plastic Ono Band》同埋《Imagine》,以及標誌性嘅歌曲例如《Give Peace a Chance》、《Working Class Hero》同埋《Imagine》。1969年同小野洋子結婚後,佢將自己個名改成約翰·小野·連儂。1975年,連儂作樂壇隱退,喺屋企照顧細仔西恩。1980年,佢同小野出嘅新專輯《Double Fantasy》復出,專輯推出三個禮拜之後喺美國紐約俾人殺咗。

連儂喺佢嘅音樂、寫作、畫畫、影片同採訪中展現咗佢反叛嘅天性同尖酸嘅幽默。佢因爲參與政治同和平運動而受到爭議。1971年,佢移民美國紐約。係嗰度,連儂對越戰嘅批評令理察·尼克遜政府長期試圖將佢驅逐出境。而佢嘅一啲歌被反戰運動同60年代反文化運動視為聖歌。

截至2012年,連儂嘅個人專輯係美國嘅銷量超過咗1400萬。作為創作者或演唱者,佢參與咗25首告示牌百強單曲榜冠軍單曲。2002年,佢喺BBC嘅「最偉大嘅100個英國人」榜單中被民眾票選為第8位。2008年,《滾石》雜誌將佢選為「史上最偉大嘅歌手」第5位。佢死咗後於1987年進入詞曲作者名人堂(Songwriters Hall of Fame),重兩次進入搖滾名人堂,分別係1988年以披頭四成員身份同係1994年以個人身份入選。