八度

C音嘅純八度音程。

八度（英文：octave）係音程嘅一種，唔講明嘅話係指純八度。

純八度

純八度（perfect octave，簡寫 P8），又叫完全八度，指頻率比例係 1 : 2，即係高八度即係頻率變兩倍，低八度即係頻率減半。喺十二平均律之下等於 12 個半音嘅距離，亦即係六個全音。相距純八度嘅兩個音一定係一樣音名。

純八度喺性質（quality）上屬於 ｢完全｣ 音程（perfect interval），亦即係音程可以睇成兩個整數嘅比例。純八度嘅兩個音嘅泛音有大概一半係相同頻率，所以聽落去感覺好似係同一個音，一般亦俾人感覺係舒服嘅。

喺和聲學入面，純八度係第二簡單嘅音程關係（最簡單嘅係純一度），亦都畀人叫做「音樂上成日用到嘅音程」。

增八度同減八度

純八度升半音叫增八度（augmented octave，簡寫 A8），即係13個半音嘅音程；純八度降半音叫減八度（diminished octave，簡寫 d8），即係11個半音。喺十二平均律之下，減八度同大七度係同一個音程，唔同名只係因為喺五線譜上面寫法唔同。