索贊尼辛
索贊尼辛（俄文：Алекса́ндр Иса́евич Солжени́цын，1918年12月11號—2008年8月3號）係蘇聯作家，入過勞改營。最出名係揭露史太林之下勞改營最慘無人道嘅一面[1]。佢1970年得諾貝爾文學獎，1974年流亡海外，1994年返去俄國。
早年
[編輯]索贊尼辛喺高加索地方出世。佢未出世阿爸就意外死咗，所以佢由阿媽養大，生活唔係咁好。又咁啱內戰，屋企莊園變咗集體農場。阿媽鼓勵佢學科學文學。
索贊尼辛做過少先隊、入過青年團，做過中學團報總編輯[1]。佢喺羅斯托大學考到數學同物理學位[1]。
勞改
[編輯]第二次世界大戰之前，佢當兵，到炮兵學校受訓。之後派去東普魯士前線，兩次受勳。1945年2月，佢寫信畀朋友，話佢唔滿意「嗰位留髭嘅領袖」。因為咁，佢畀國家安全警察捉咗，話佢犯咗反蘇宣傳同埋搞敵意組織，重判八年勞改營（集中營）改造，兼永久國內放逐；由於佢有大學學位，同埋都唔係罪大惡極，係用得嘅科學人才，所以調咗去莫斯科附近嘅「科學苦工營」，做啲科研工作[1]。1950年，佢送咗去哈薩克，做過開礦，砌磚同埋鑄鐵。1953年，刑滿後國內放逐，同年患癌，差啲死。1954年畀佢入醫院醫病，而且醫好咗。1957年恢復名譽，准返去歐洲。
成名
[編輯]1961年，索贊尼辛去咗莫斯科約莫70英里外小鎮，敎中學物理科，課餘以勞改營見聞寫小說，佢個短篇小說《伊凡丹尼索維奇的一天》（A Day in the Life of Ivan Denisovich）就係呢個時間嘅作品。本書揭露地獄式集中營內幕，本來都唔可能有機會出版，不過咁啱蘇共中央第一書記赫魯曉夫想密謀清算史太林，用佢來打擊史太林嘅文宣工具。索贊尼辛將呢篇小說送畀舊時同室囚友、當時嘅《新世界雜誌》主編。呢位主編係赫魯曉夫同路人，繞過老左文化官僚，將本嘢交赫魯曉夫手上；赫魯曉夫讀得動容，可以用，批准發表，第一書記拍板，就唔使理政治局常委。《新世界雜誌》喺1962年11月發呢篇文，香港信報嘅林行止話係「等同投重磅炸彈落蘇共」[1]。
流亡
[編輯]之不過，赫魯曉夫好快畀人趕落台，蘇聯政治又左轉，索贊尼辛變咗係當權者嘅危險人物。佢1970年得諾貝爾獎，都唔敢出國領獎，擔心當局唔畀佢返來。其後佢被迫經西德流亡瑞士，最後到美國；佢住喺美國18年，離羣獨居，住農莊，幾乎足不出戶、唔聽電話、唔問世事、唔同隔籬鄰舍來往，專事寫作。期間寫成史詩《血輪》（The Red Wheel），講1914年到1917年，蘇維埃革命四部曲，一共五千幾版。但讀書界反應欠佳[1]。