終端機

VT220 終端機

終端機（英文：terminal）係一種接駁電腦，等用家可以用電腦嘅舊式架罉，通常有熒幕同鍵盤，直接透過串連式介面輸入同輸出文字內碼同控制碼（英文終端機通常用7位元嘅 ASCII，但係可能會用 ASCII 或者 ISO-2022 嘅控制碼做擴展）。駁去嘅通常係大型電腦（mainframe）、中型電腦（midframe）或者小型電腦（minicomputer），但係如果操作系統支援（例如類Unix系統），亦都可以駁我哋而今一般用嘅所謂微型電腦。如果係微型級以上嘅電腦，一架電腦通常會駁多過一架終端機。

終端機唔係電腦，淨係識顯示文字資料（有啲會識畫圖），但係亦都唔係電腦熒光幕，唔識處理視訊。

而今喺 Linux 或者 BSD 系統都仲用得終端機。

對 Unix 嘅影響

Unix 用家接駁電腦嘅方法本來就係終端機，變咗串連式介面嘅輸入同輸出全部都當成終端機（terminal character device，簡稱 tty）處理，甚至用網絡做連線嘅介面都叫做 ｢偽終端機｣（pseudoterminal，簡稱 pty）。

Unix 亦都因為要整文字介面嘅時候易啲，將好多牌子嘅終端機抽象化，整咗一套叫 curses 嘅函式庫；因為 curses 將輸出做咗好多嘅最佳化，輸出嘅字跳來跳去，令到 Unix 嘅文字介面同而今市面上嘅熒幕閱讀器並唔相容。

對 Microsoft 系統嘅影響

MS-DOS 嘅 command.com 同新版 Microsoft Windows 嘅 cmd.exe 都支援 VT100 系終端機嘅部分格式化功能，Microsoft 叫呢啲做 ANSI escape codes，通常寫手稿或者改命令提示符先會用。

取代品

喺 X 視窗系統出現之後有所謂 ｢X 終端機｣，其實係一種內置熒幕嘅電腦。

喺 Unix 以外嘅世界用嘅係電腦熒光幕。

而今喺電腦上面嘅所謂 ｢終端機｣ 其實係終端機模擬器，即係扮某牌子某型號嘅終端機嘅公用程式。