羅孚

羅孚（1921年—2014年5月2號），原名羅承勳，先後係中國同香港編輯兼作家，喺《大公報》、《新晚報》、《文匯報》做事。佢戰後定居香港。佢係中國共產黨員，有份負責香港、澳門、臺灣等地統戰，廣交人物。一九八二年畀中國判間諜罪而軟禁十年，到一九九三年先放返。

屋企

羅孚一九二一年喺桂林出世。二零一四年五月二號凌晨因肺炎離世，享年九十三嵗。

羅孚有個仔羅海星，一九四九年香港出世，以參加黃雀行動而聞名。孻仔羅海雷，寫過《我的父親羅孚》。

事業

大公報

一九四一年，當時中華民國同日本打仗。羅孚喺桂林讀完中學，做《大公報》，戰時輾轉到咗重慶《大公報》。日本戰敗後，到國共內戰。喺一九四八年，羅孚轉到香港《大公報》。自此喺香港做嘢。佢亦去過香港大公報之下嘅《新晚報》做嘢。

新晚報

一九五四年，太極派掌門人吳公儀同白鶴派掌門人陳剋夫，二人喺報紙筆戰，難分勝負。一月十七號，二人簽下生死狀「各安天命」，相約到澳門比武。就喺呢日，《新晚報》新聞大字標題「兩拳師四點鐘交鋒香港客五千人觀戰」。羅孚有兩位同事，都好武俠小說同圍棋，呢兩位查良鏞同陳文統。羅孚見大戰哄動，勸陳文統寫武俠小説。比武第二日，《新晚報》就預告刊登武俠小説，吸引同好武讀者。第三日，陳文統《龍虎鬥京華》開始連載。後尾，羅孚又請查良鏞參戰，於是，又有《書劍恩仇錄》。兩人後尾都名聞於世，查良鏞就係金庸，陳文統就係梁羽生。

佢初頭係做編輯，後尾做到總編輯。

其他工作

羅孚編輯過香港《大公報》、《文匯報》嘅《文藝》週刊。

作家

羅孚有筆名絲韋、辛文芷、吳令湄、文絲等。喺中國筆名有柳蘇，喺《讀書》雜誌，寫過香港作家介紹。

作品

羅孚有作品《南斗文星高—香港作家剪影》、《燕山詩話》、《西窗小品》等，亦編過《聶紺弩詩全編》、《香港的人和事》等。