美人 (位號)

美人，係古代中國、越南君王後宮妃嬪既一個等級。《漢書．外戚傳》話：「漢興，因秦之稱號，帝母稱皇太后，祖母稱太皇太后，適稱皇后，妾皆稱夫人。又有美人、良人、八子、七子、長使、少使之號焉」，可以睇到，秦朝（或者更早）已經有「美人」呢個後宮既等級，「美人」既地位喺皇后之下。

《後漢書．皇后紀序》嗰度話：「及光武中興，斲雕為朴，六宮稱號，惟皇后貴人，金印紫綬，俸不過粟數十斛。又置美人、宮人、采女三等，並無爵秩，歲時賞賜充給而已」，可以睇到同皇后、貴人唔同，當時既「美人」、「宮人」、「采女」係無正式既品位，只係過年過節既時候，得到一啲賞賜。清朝乾隆年間編既《欽定四庫全書．文獻通考卷二百五十四》嗰度話：「晉武帝采漢魏之制……其餘有美人才人中才人爵視千石以下……美人才人一十五員品正第四是為世婦」，可以睇到漢朝同埋晉朝，美人係正四品，有千石以下既俸祿。

魏晉南北朝既時候，美人既地位低過九嬪，高過才人。隋朝「美人」屬於世婦，地位低過婕妤，高過才人、寶林，仍然係正四品。

根據《新唐書．后妃上》，唐制既皇后之下，有四夫人、九嬪，然後係「婕妤、美人、才人各九，合二十七，是代世婦。寶林、御女、采女各二十七，合八十一，是代御妻」，可以睇到唐朝既美人有九個位，地位低過婕妤，高過才人。《新唐書．后妃上》又話：「開元時，以後下復有四妃非是，乃置惠、麗、華三妃，六儀，四美人，七才人……」，可以睇到唐玄宗李隆基開元年間，美人既人數後嚟減到四人。

五代宋遼金其間，沿用唐朝呢個制度，去到元朝就廢除咗美人呢個封號。元朝既後宮等級比較簡單，只設立皇后同妃子兩個等級，妃子既人數無規定。

明朝後宮妃嬪等級一般係皇后、皇貴妃、貴妃、妃、嬪，不過明代既嬪妃制度比較混亂，無統一既制度，每個皇帝都有好多新既嬪妃稱號。明朝皇帝用過既「散號」（非常設既位號）包括：婕妤、昭儀、昭容、貴人、美人等。如果計埋「散號」，明朝既妃嬪等級制度係：皇后、皇貴妃、貴妃、妃、嬪、婕妤、昭儀、昭容、貴人、美人。而明朝東宮，太子妃之下，設有才人、選侍、淑女三等。

清朝無設立美人既個位號。

主要人物

• 虞美人 (項羽)

• 許美人 (漢光武帝)
• 虞美人 (漢順帝)
• 王美人 (漢靈帝)
• 劉美人 (張駿)
• 田美人 (晉廢帝)
• 蔡美人 (宋文帝)
• 蔣美人 (南朝宋文帝)
• 楊美人 (南朝宋文帝)
• 泉美人 (劉友母)
• 蕭美人
• 紀美人 (唐憲宗)
• 晁美人 (唐宣宗)
• 徐美人 (宋真宗)
• 楊宗妙
• 欽慈陳皇后
• 高美人 (宋哲宗)
• 王美人
• 陳美人