美國國防部軍營超市管理處

一間美軍超市

國防部軍營超市管理處（英文：Defense Commissary Agency）係美國國防部轄下一個機構，響1990年成立，總部設於美國維珍尼亞州李堡基地，負責經營全球各地多過250間嘅軍人超市（Commissary）；呢尐超市提供食品、雜貨同日用品俾美國各軍種嘅現役、預備役、退伍軍人同符合條件嘅軍人眷屬，價格平均比民間超市平30%左右。

名

國防部軍營超市處管理嘅超市分店「Commissary」，響美軍同監獄入面係指販賣食品嘅商店，而呢個單字更原始嘅意思係指負責軍需同士兵輸送嘅軍官。所以軍營超市管理處喺中文會譯做「國防物資局」、「國防部零售局」、「國防部給養局」等等。

史

軍需部門販售商品畀軍人嘅歷史，可以追溯去1825年，當時派駐響特定基地嘅美國陸軍軍官已經可以以成本價買日用品；1841年，佢哋都可以買日用品畀自己屋企人用。

1867年，軍需用品賣店實質上進入咗現代化階段，服務對象擴大去到入伍士兵，而且唔受地理限制影響：無論部隊位於戰區定係大都市附近，基地官兵都可以買到軍方販售嘅用品。從一開始，軍賣店就包攬咗營區內嘅零售服務，將民間廠商同小販排除在外；而軍賣店提供嘅食品亦都比一般軍糧更加合乎衞生同健康；透過賣嘢帶嘅收入，補充咗軍方嘅資金來源。呢種軍隊內成立商店、販賣價廉物美嘅食品畀官兵，改善軍人福利嘅現代化概念，已經存在咗百幾年。

軍中商店嘅發展同成長，大致上同零售雜貨工業嘅發展階段互相吻合。發展到依家，一般美軍超市嘅清單入面都有大約11,000樣貨品，最大型嘅超市更加係再多幾千樣。

同時，美軍商店嘅服務對象自發跡時期開始已經不斷增加。初期只有服緊役嘅陸軍官兵可以消費；1879年起，退役軍人、後備役軍人同軍人配偶、仔女亦都開始享有呢類優惠。而今日，美國海岸防衞隊、美國國民警衞隊嘅人員可以響全球任何一間美軍超市分店買嘢。

隨住美軍扮演嘅角色更重要、規模更龐大，美軍軍人市場都開始朝海外擴張。1898年下旬，第一間海外軍營市場響菲律賓馬尼拉近郊開業；憑住低廉嘅價格，喺頭一年就賣出價值總計4萬美元嘅商品。1900年平定義和團運動之後，又響北京開咗美軍市場，嗰年底重喺天津設立中國第二間分店。同類型嘅市場亦響古巴、波多黎各、關島同夏威夷出現，喺1903年美國開始鋪運河嘅巴拿馬亦有幾間美軍商店。

其他軍種都開始仿效陸軍，依照自身需要設立商店。美國海軍同轄下嘅美國海軍陸戰隊分別響1909年同1910年開第一間軍人市場。美國空軍軍人超市就喺1947年，由原先嘅美國陸軍航空軍軍營超市延續而成。1970年代中期，每個軍種嘅軍人超市都有自己嘅管理部門，分別係陸軍部隊支援處、海軍零售系統支援署、海軍陸戰隊勤務司令部軍營超市處同空軍軍營超市處。

1989年，美國國會指示美國國防部對各軍種嘅軍營超市管理部門進行延究。由陸軍中將瓊斯主持嘅委員會之後提出咗一份報告，建議整併各軍種嘅超市管理系統，成立一個新單位統一管轄，以改善服務同埋慳經費。1990年5月15號，國防部成立咗軍營超市管理處。根據美國國防部副部長嘅備忘錄，呢個係冷戰後美軍裁軍期間，第一宗進行嘅國防部部門合併案。陸軍少將德雷斯卡響同年7月出任第一屆處長，同時由一個專業團隊管理過渡期各個軍種超市部門嘅整合。1991年10月1號，國防部軍營超市管理處開始掌管所有嘅美軍超市。

現況

從19世紀誕生至今，美軍超市一直賣近乎成本價嘅商品，但係顧客響消費嗰陣，依據1952年美國國會嘅一項指令，要畀一筆附加費。1983年4月之後，類似嘅附加費被定為消費額嘅5%。同一般嘅稅唔同，購物附加費係直接畀美軍超市，用嚟增闢分店同維持現有分店嘅營運備。

因為價格低廉，全球各地響美軍超市消費嘅官兵慳咗大約30%嘅購物費。美軍各超市分店每年嘅總銷售額大約有50億美元。喺幾項調查當中，軍營超市一直被認為係美軍最好嘅福利之一。