美術展

美術展（英文：art exhibition），又叫藝術展，又或者按創作媒體叫畫展等等，係藝術家公開發表作品嘅一種途徑；有冇定期開或者參加美術展亦係斷定一個人算唔算係職業藝術家嘅其中一個準則。

美術展通常會喺有 ｢四埲牆｣ 嘅場地舉行，而最通常係喺畫廊，但係亦可以係第啲地方，例如美術館、圖書館等等。

開過或者參加過乜嘢美術展係藝術家嘅履歷表入面一定要有嘅部份，不過除非係新畢業或者新晉藝術家，呢部分可以撮要。

分類

按性質，美術展可以分成會賣同唔會賣啲作品嘅兩大類，不過就算係前者，如果商業味太重，可能會算係藝術展銷會而唔算係美術展。

按幾多個藝術家喺同場展出，美術展亦可以粗略分做個展（solo exhibition）同羣展（group exhibition）兩大類；淨係係展出一個藝術家嘅作品嘅叫個展，展出多過一個藝術家嘅叫羣展。

美術展可以有陪審團（juried）或者冇（non-juried），而有陪審團係指藝術家參展會經過評審。

喺美術學校畢業嘅學生，除咗行畢業禮之外，通常都要或者會參加畢業展（graduation exhibition、graduate exhibition 或者 thesis exhibition），呢啲好多時係全校、全系或者成個課程所有畢業生嘅作品一齊展出；因為多個一個藝術家，算係一種羣展。某啲學生，例如攻藝術嘅碩士生，課程可能會規定佢哋一定要開個展，呢啲學生嘅畢業展會係首先開個展，然後參加全系或者全校嘅羣展。

展覽目錄

内文：展覽目錄

美術展係有時限性嘅作品發表方法，完咗就冇。有啲展覽完咗會將有關資料輯錄成書，叫展覽目錄。細展覽可能會間館或者畫廊將成年所有展覽嘅紀錄夾埋一本；大型展覽可能會一個展覽出獨立嘅一本書。