履歷
履歷，又叫履歷表，係個人學歷同工作經驗嘅簡要陳述，通常用喺搵工、升學，希望可以得到見工或升學面試嘅機會。除咗叫履歷，好多時都會用法文résumé或者拉丁文curriculum vitæ，或者就咁簡稱CV。
履歷記載一個人嘅教育學歷、專長同埋工作經驗，有時會補充個人特質、興趣或期望等。主要目的通常係搵工或升學嘅人希望得到面試機會嘅工具，亦都係一份公司人事部或教育機構篩選候選人嘅程序之一，所以履歷非常重要。
履歷表應有項目[編輯]
履歷表喺唔同國家地區、唔同行業都會有唔同嘅要求。喺香港，一般嘅履歷表應有項目包括：
- 個人基本資料
履歷表最開頭一定要係自己個名，之後列出其他個人聯絡資料，例如：聯絡電話、地址、E-mail等，呢啲都係必要嘅，唔係嘅話僱主就聯絡唔到你。
- 應徵職位
簡單清晰列出你希望應徵嘅工作職位，唔使寫希望應徵嘅原因，唔係嘅話履歷會太長。
- 學歷
要以倒敍形式列出，先寫最高學歷，整齊嘅寫上年份，僱主睇嗰陣就一目瞭然。
- 工作經驗
可以根據工作嘅種類或工作嘅先後順序分類，寫上工作職位同工作內容，並同學歷一樣喺靠右邊或靠左邊整齊噉寫上工作年份。
- 其他活動
其他你認為重要而且對工作有幫忙嘅活動都可以喺呢部分列出，例如喺學校做過嘅職務、曾經做過義工等。
- 獎項/證書/專業考試
可以列出之前喺學校、工作攞過任何同工作有關嘅獎項、證書、專業考試資格等。
- 技能/語言
列出個人技能，例如電腦應用、打字速度等，同埋列出你可以講同寫嘅語言/語文。
- 可以返工日期
寫出幾可以返工，例如；即時、七日通知、一個月通知。
Résumé 同 CV 嘅分別[編輯]
喺某啲英語地區，例如英國，résumé 同 CV 係冇分別嘅，但係喺第啲英語地區（例如北美），résumé 同 CV 係兩樣唔同嘅嘢。
Résumé（喺北美亦可串 resumé 甚至 resume）其實算係英文字，唔可以算係法文（喺法文履歷係 curriculum vitae，唔會用 résumé 呢個字）。呢個字喺法文嘅原意係 ｢撮要｣，所以 CV 喺北美通常指一般求職用，一兩頁紙（最好只係一頁），｢撮要｣ 過嘅履歷。CV 一般指冇撮要過嘅學術性履歷，好多時可以有幾頁甚至十幾頁紙咁長。不過，某啲特定嘅行業，例如音樂、藝術等等，亦都叫履歷做 CV，但係藝術家嘅 CV 即使撮要咗都仍然係都叫 CV。