茶果嶺天后廟
茶果嶺天后廟係香港一間天后廟，位於九龍觀塘區茶果嶺，係香港少數完用嗮麻石起嘅廟，依家由華人廟宇委員會負責打理。
茶果嶺天后廟喺清朝道光年間時官府所建，並由當時觀塘居民合資。據廟門石額所記，現存嘅建築喺光緒辛卯年（光緒十七年，1891年）重建[1]。
廟宇原位於觀塘灣灣畔（今日麗港城一帶），直到1941年因該址被選為興建亞細亞油庫，先至搬到茶果嶺現址，並喺1947年重修過。喺1999年再重修時，重現原本嘅石砌建築，呈現古樸嘅氣質。廟內正中嘅神壇供奉天后，以金黃色為主色，而左面嘅神壇供奉魯班，右面神壇供奉觀音。
天后廟面闊三間，深兩進，規模屬中型。而最具特色之處就係整座建築都用花崗岩建成，在香港以至鄰近地區，都係少見嘅例子。村民至今依然虔誠禮奉，每逢農曆三月廿三天后寶誕，村民舉辦別具特式嘅花炮巡遊以及粵劇賀誕表演慶祝。