荃灣石棺藏屍案

出自維基百科,自由嘅百科全書
Jump to navigation Jump to search
案發地點:DAN6

荃灣石棺藏屍案,又叫荃灣水泥藏屍案,係香港2016年一單兇殺案,發生喺新界荃灣灰窰角街2-6號一座叫DAN6嘅工廠大廈入邊一個單位,死者條屍俾人埋咗入一個石屎方塊。

經過[編輯]

死者係28歲男子張萬里,喺2016年3月7號俾佢女朋友報失蹤,警方調查一路未有結果。3月29號,警方收到風,話死者最後去過「DAN6」9樓一個單位,當晚7點幾去嗰度調查,發現單位傳出惡臭,破門後發現臭味來自屋入面一嚿四面用木板封起、3呎乘3呎乘2.5呎嘅石屎方塊。消防員幫手鑿碎石屎,發現死者條屍喺石屎入面,畀膠袋、枕頭袋包住同畀繩綁住。

警方初頭先後喺香港拉過三男兩女,包括死者女朋友,不過深入調查後,鎖定疑兇係著草去咗台灣嘅三男一女。到4月10號晚,女疑兇何菱瑜主動到新北市一間派出所投案,話驚俾其他三個疑兇滅口。第二日台灣警方搵埋佢哋三個,並且用入境簽證過期做理由將佢哋遣返香港。

4月13號,警方安排女疑兇何菱瑜重組案情,第二日喺荃灣法院提堂。案情透露,死者喺3月4號俾人殺死,估計死因係窒息。何喺警誡下承認曾經同3名男疑兇商討殺死死者。而三名男被告就喺警誡下承認曾經喺死者大髀髀罅打針,同埋用哥羅芳掩住死者口鼻。

8月12號,何菱瑜獲撤銷控罪,而曾祥欣、張善恒同劉錫豪就喺2016年4月13號正式被落案起訴串謀謀殺罪。案件喺2018年4月正式開審,其中何菱瑜獲安排做特赦證人。2018年5月,主審法官因病要即刻停工,而要解散陪審團,到2019年10月重新開審。

涉案者[編輯]

  • 何菱瑜(轉做特赦證人):花名「小草」,原名何靜汶,案發時18歲,女性,曾經喺旺角一間日式女僕咖啡店做侍應,平時打扮性感,鍾意著短裙仔。根據佢喺法庭嘅作供,佢1998年喺中國大陸出世,兩三歲跟屋企人嚟香港定居,2015年改用依家個名。
  • 曾祥欣(第一被告):案發時26歲,男性,曾經被指係何菱瑜嘅男朋友,不過俾何菱瑜正印男朋友「阿賢」否認。
  • 劉錫豪(第二被告):案發時21歲,男性,參加過亞洲電視亞洲星光大道4 跳舞吧!》。
  • 張善恒(第三被告):案發時23歲,男性。

參考[編輯]