莫卡咖啡
 |
莫卡咖啡（簡稱：莫卡；又叫：朱古力咖啡；國語：摩卡咖啡（簡稱：摩卡）；英文：caffè mocha（簡稱：mocha））係意式鮮奶咖啡變種。同意式鮮奶咖啡一樣，三分之一意式特濃咖啡，三分之二蒸氣發泡鮮奶配成，不過佢重會加少少朱古力。朱古力通常會用朱古力糖漿，但係有啲咖啡機，會改用即溶朱古力粉。有時，打起咗嘅忌廉、可可粉，同埋綿花糖都會加埋響上面，加重咖啡香味，兼做裝飾。
同意式泡沫咖啡唔同，莫卡咖啡上面冇鮮奶泡沫嘅。取而代之，莫卡咖啡上面，通常係啲打起咗嘅忌廉，同埋肉桂粉或者可可粉。
另一個意式鮮奶咖啡變種，係白莫卡咖啡。同莫卡咖啡唔同嘅係，白莫卡咖啡係由白朱古力，而唔係朱古力配成。除咗白莫卡咖啡之外，重有幾種意式鮮奶咖啡變種，由朱古力糖漿、白朱古力糖漿配成嘅。
有啲歐洲同中東嘅地方會以 moccaccino 去形容加咗可可或者朱古力嘅意式鮮奶咖啡。而響美國，moccaccino 就係指加咗朱古力嘅意式泡沫咖啡。
莫卡係也門港口，位於亞拉伯半島南端，種咖啡西南亞國家。莫卡咖啡呢個名，至早出自也門莫加港嘅咖啡品種，呢種咖啡雖然冇加朱古力，但聞起嚟就好似加咗朱古力一樣。
