蓋爾式足球
蓋爾式足球（愛爾蘭蓋爾文：Peil Ghaelach或者Caid、英文：Gaelic Football）係一種喺愛爾蘭好流行嘅球類運動，同板棍球並列為愛爾蘭兩大蓋爾運動。
由於規則嘅相似性，蓋爾式足球經常被人拿來同橄欖球做比較，但係其實蓋爾式足球同橄欖球嘅起源係完全唔同嘅。
規則
[編輯]場地
[編輯]
蓋爾式足球嘅場地大過橄欖球場少少，長方形，長130到145公尺，闊80到90公尺；球場兩端各有一個H形球門，兩邊立柱高約7公尺，門楣位於離地面2.5公尺處，闊6.5公尺，門楣下面嘅球門後面有網。
時間
[編輯]郡際級以上嘅賽事先至會一場打足70分鐘；大部分成年組同21歲以下組嘅蓋爾式足球比賽，一場祇會打60分鐘。比賽分上下半場，每半場35分鐘或者30分鐘，法定時間之內分唔到勝負，就會打20分鐘加時賽，加時賽亦都分上下半場。
隊員
[編輯]每隊正選15人。
得分
[編輯]蓋爾式足球嘅得分方式有兩種：
- 一分球（point）：球從門楣上方，兩條立柱之間通過，得一分；可以腳踢或者用拳頭打球，但係用手擲球唔算。
- 三分球（goal）：同足球嘅射門入球得分一樣，用腳將球踢入球門，得三分。踢球前可以用手控定個球，但係唔可以用手將個波整入龍門。不過，防守球員掂到個球，而個球入咗龍門，就算係擺烏龍，對方得三分。
一場比賽嘅總得分＝（三分球數×3＋一分球數×1）；總分相同就比較一分球數。
得分記錄嘅格式係：先記三分球，再記一分球，中間用短橫隔開。例如：3-09係支球隊入咗三個三分球，九個一分球，總得分18分。
犯規
[編輯]技術犯規（technical foul）
[編輯]- 手控球移動到第四步（根據規則，控球員跑夠三步就要處理個球，可以拍球、用腳挑球或者傳畀隊友）
- 手連續拍球兩次
- 同一個球員左手畀右手或者右手畀左手
- 手掌控球傳球
- 直接執起喺地下嘅球
犯規（foul）
[編輯]- 扯衫
- 肢體衝撞
- 雙手擒抱
- 剷球
- 用雙手將控球員攬住嘅球出力搶走
- 喺小禁區裡面觸碰守門員
