蛇齋餅糭

蛇齋餅糭又寫做蛇齋餅粽，係指香港某啲政黨有時出於利益，將一啲嘢食或禮物派畀市民、提供免費活動等，通常係指以小賄賂嚟收買人心。

蛇齋餅糭當中嘅「蛇」係指蛇宴；「齋」係指齋宴；「餅」係指中秋節嘅月餅或者農曆新年嘅年糕；「糭」係指端午節嘅糭，亦包括各種嘅特價海鮮餐、郊外一日遊、影特價證件相、免費剪頭髮、免費量血壓同埋各式各樣嘅免費社區活動等。雖然呢啲都係屬於賄選嘅行為，但係因為呢啲嘢太過模糊，有時叫做「社區服務」，有時又叫「市民聯歡」，所以可以游離喺香港法例之外，成為香港政治特色之一。

背景

因為香港人口稠密，每個選區可能只有四、五個街區之隔，有啲地方每日都會見到大多數嘅選民，就可能用各種方法嚟同選民拉近關係。

文化影響

• 2012年推出，以香港政治為主題嘅紙牌遊戲《神聖一票》，對親中派以蛇齋餅糭進行地區工作，以輸送利益去到有賄選之嫌亦有所諷刺，其中一張牌就係叫做「蛇齋餅糭」，玩家可以用嚟增加自己嘅選票。