蜂王

中間大隻，蜂王

蜂農同蜂王上色做標記

蜂王，蜜蜂竇亞頭，有乸無公。好似王咁統治，獨一無二。佢靠傳遞蜂王物質，支配王國。佢亦係成竇蜜蜂個老母，因而又叫母蜂。而日本叫佢女王蜂。蜂王同工蜂都得乸，而蜂王點喺幼蟲中脫穎而出，純粹餵蜂王漿十幾日，化成蜂王。而其他幼蟲得幾日，呢啲乸就無得做蜂王，化成工蜂。

查實唔祇一隻會化成新蜂王。之不過，一班候補蜂王，會畀工蜂封死喺蠟室入便，出唔到來。直至新蜂王離巢，帶走部份工蜂。下一隻由工蜂決定放佢出來。

蜂王會出面揀雄蜂交尾，一生可能得一次數次。由於雄蜂齋食花粉維生，體力弱過蜂王。蜂王會放出化學訊息，引班雄蜂追自己，從而揀出至壯嗰隻同自己交尾。交尾完，就會折斷佢個生殖器，連內臟都扯埋出來，雄蜂就會死。而蜂王留住佢啲精子，可以成世生一大竇工蜂。

有時因英文而誤繙成蜂后，以為蜂羣入便有蜂王有蜂后，祇不過蜂王誤稱蜂后咁解，大家指同一樣嘢。

記載

一八八六年，荷華文語類參入便，有記載蜂王，講佢生態習性。

「

蜂王。蜂母。蜂王其色青蒼、差大于常蜂、無毒。蜂每歲三四月則生黑色蜂、名曰將蜂。又名相蜂。相蜂不能採花、但能釀蜜。蓋無此蜂、不能成蜜。至七八月間、相蜂盡死。相蜂如不死、則羣蜂饑。俗謂。相蜂過冬、蜂羣必空。蜂王大如小指、不螯。蜂無王、而盡死。有二王而卽分。密母色黑。正月旦爲蜜蜂周行諸山求安處。羣蜂隨之。蜜母暮還入蜂中。

」

基本概念

睇埋：蜜蜂同真社會性

蜜蜂具有真社會性，一羣蜜蜂入面會有好仔細嘅分工：一個蜜蜂竇入面一般會有一隻蜂王、10,000 到 150,000 隻工蜂、以及係 500 到 1,500 隻蜜蜂公，而部份嘅蜜蜂竇會有兩隻蜂王；頭嗰兩種蜜蜂都係乸，當中得蜂王，有生殖能力－即係話工蜂係冇生殖能力嘅乸。

生命週期

蜂王係一隻非一般嘅蜜蜂乸，喺好特別嘅情況之下先會生到出嚟：工蜂喺餵幼蟲嗰陣，會分泌一種叫蜂王漿嘅物質俾幼蟲食，多數嘅幼蟲，無論公乸，淨係喺幼蟲期初期有蜂王漿食，得極少數嘅蜜蜂乸有機會幼蟲期全程食蜂王漿；一隻一路淨係食住蜂王漿嘅幼蟲乸會發育成蜂王，如果唔係一路淨係食蜂王漿嘅就會發育成工蜂。如果一隻幼蟲乸真係全程食足蜂王漿嘅話，佢就會喺 16 日之內發育成蜂王。

睇埋

• 蟻后
• 白蟻后