街名

香港街名

澳門街名連花名

街名係一種名，用來認街認路。地埗上面會有街名，有啲會為街上屋宇加上編號門牌，方便人搵。不過並非處處都用街名，好似日本城下町，啲街又窄又亂，咁未必有名，就會分細區用上編號，何丁目何番何號。類似結構亦唔止日本有。

無通名街名

街名可以隨人任改，然而專名加通名較為常見。以香港為例，一般街名，如青山道，青山屬專名，道屬通名。然而少數好似十間同己連拿利咁，·唔用通名。有啲會加四方、八方，拆開兩三段，如德輔道就拆成東中西三段，有按西式接尾，好似皇后大道東，有按唐人放喺通名前，好似文咸東街咁。有啲又分上下，舊新咁，如上亞厘畢道，舊山頂道咁。

英國美國興叫購物地區，中間條街叫主街，Main Street，或高街，High Street，其次就第二街，Second Street。唐人地方唔會叫。雖則有啲村會有市，有條正街或大街，後面加條後街咁。美國至常見街名，正正第二街。

傳統唐人街名，多數喜慶同好意頭，其次就地貌風土典故而名。西洋興用人名，有用姓，有用名，唐人原本唔點用，皆因名緯有忌，後來都跟西方習慣，以留名後世。亦有以原居地而名，以紀思鄉之情。而遠路名，就會去目地而名，如大埔道，就市區去大埔而名。不過依興兩地名取字命名，如青沙公路，青衣到沙田咁解。有啲街除咗本名，亦有花名，以示條街當地行頭，如永安街又名花布街，以賣花布出名。

通名各有各分法。按大細層次，急道、大道、橫街窄巷小徑，各有一堆命名法，可以跟當地來睇。亦有按形狀，亦有跟功用。西洋依方面特別多，又可能幾種話混用，山林水莊，圓方弓屈，諸如此類，都做得通名。唐名基本就簡單好多，道、路、里、巷、徑、圍、臺、坊、地、場、橋。功能形狀，亦可以添字，如公路、隧道、廣場、大橋、繞道、天橋、前地、圓形地、馬路、大馬路、斜巷。有啲英文特別走廊、交匯處、幹線，葡文斜坡、石級。

柯士甸路雖有英文Avenue，亦非林蔭大道

有時名有啲隨意，未必名相符合，時代準則亦有唔同。好似有啲街好窄巷咁，有啲街就闊到大道咁。西洋定義林蔭大道，即Avenue，亦未必有一排排樹。

改咗好多次名

街名有時會改名。有啲認為不合時宜，有啲為咗紀念，有啲想好聽啲，有啲將錯就錯，有啲以示新政。有時政治轉變，改好幾次都唔奇。