西裝
男性西裝最為規範化，長袖外套、相配嘅長褲、長袖恤衫、領呔，係男性套裝嘅基本服飾。外套配長褲叫做兩件式西裝（two-piece suit）；加埋背心（waistcoat）就叫做三件式（three-piece suit），但而家比較少見。女性西服就比較多樣化啲，不過基本上可以歸納為外套、相配嘅裙或者褲、同埋女裝恤衫（blouse）。
舊式西裝甚至有相配嘅帽，男性可以戴fedora軟呢帽或圓頂硬禮帽，女性就戴藥丸盒帽（pillbox hat）。不過今時今日，藥丸盒帽多數只係護士或者舖頭服務員制服嘅一部分，男性都冇乜點戴帽。
歷史
[編輯]無論男性女性，歷代西裝款式發展都向簡便發展，着套裝嘅場合亦都越嚟越少。而家一般淨係得正式或者商務場合、唔着唔得嘅時候先會着套裝，西裝唔再係日常服飾。1990年代起，北美洲有唔少商業機構都開始接受員工着便服返工。開始只係星期五至畀咁着，但而家有唔少公司都畀員工成個禮拜都可以唔着成套西裝。咁有時反而引起混亂，因為員工唔清楚點先算適當嘅返工衫。
喺亞洲等熱帶地區，甚至有好似日本咁嘅COOL BIZ政策，畀打工仔着短袖恤衫、男性唔使打呔。咁樣，室內地方就唔使為咗就啲着西裝嘅人，而過分調低冷氣溫度，咁咪可以減少環境破壞囉。
男性西裝
[編輯]現代西裝出現之前，近代西方男性出席商務場合着嘅套裝，有一件又長又厚嘅黑色外套，叫做frock coat。直至19世紀末期，美國人開始改着啲輕便啲、只係長到腰位嘅外套，叫做sack suit。咁成為咗非正式、非勞動場合嘅日間標準裝束，即使係最樸實嘅男性亦會有套咁樣嘅西裝，等喺星期日返教會嘅時候着。第二次世界大戰之前，呢種簡便套裝會連埋背心穿着，今日就比較少見。
另一方面，晚間套裝亦都發展出一種非正式裝束。原本嘅燕尾服（white tie）演變出小晚禮服（black tie，又叫tuxedo）。時至今日，小晚禮服甚至取代咗燕尾服，成為出席晚間場合嘅標準裝束，而歷史較長嘅燕尾服只係留喺最莊重嘅場合着，例如宴會、音樂演奏會、受勳儀式咁。日間嘅正式裝束就係早禮服（morning dress）。雖然話現代場合一般已經唔係太拘泥於咩繁文縟節，但係視乎出席場合所要求嘅禮節，請柬上應該會註明着衫要求。
女性西裝
[編輯]女性着嘅現代西服套裝多數限於商務場合。女性去波（宴會）之類嘅正式場合多數會着波衫（正式禮服，ball gown）。
20世紀初，由外套同裙組成嘅套裝成為咗西方女性日間嘅日常服飾，適合返工同平時着[1]。相比男性套裝，女性套裝物質輕柔啲，裁剪亦都貼身啲，突顯女性身型通常充滿曲線感嘅姿態。1960年代開始出現配褲嘅女性套裝，但係被社會接受做返工衫嘅過程就比較慢。隨住時代發展、社會開放，套裝嘅裙亦都有向短發展嘅趨勢。1990年代，迷你裙再度成為流行服飾，西裝短裙嘅長度亦因為咁而受到影響，會因應當地習俗同情況而異。
穿着禮儀
[編輯]褸扣鈕
[編輯].jpg)
雙排扣嘅褸應該一直扣好鈕；單排扣嘅褸就只需要企起度至要扣鈕，坐喺度唔使，以免件褸變形。
有三對紐嘅褸，可以自由選擇扣幾多對，但就應該從最上面扣起。兩對鈕嘅褸就只係應該扣最上面嗰對。
西裝顏色
[編輯]一般西裝顏色有海軍藍、淺灰色、深灰色（炭色）、黑色等，通常冇圖案或者係細條紋。黑色都係小晚禮服嘅顏色。
呔
[編輯]領呔一般係個人品味，但嚴肅穿著嘅話可以概括出幾項要點。呔嘅頻色應該深色過底下件恤衫，同時唔應該同色（撞色）。條呔最好可以襯托返件恤衫或者套裝嘅顏色。總括嚟講，出席嚴肅場合或者宴會唔應該打顏色鮮豔或者圖案誇張嘅呔，不過點先算鮮豔、誇張就見仁見智嘞。
領呔打得好應該啱啱長到、或者冚住個皮帶扣，後面幼嗰邊唔應該髧長過前面闊嗰邊。
襯衫
[編輯]男裝一般着長袖布質縫製嘅恤衫，所有鈕由領到恤衫最下低全部扣好。恤衫要燙整齊，束入條褲入面。一般傳統恤衫係淺藍或者白色，當中以白色最保守。有法式袖口嘅恤衫算最正式，呢種恤衫個袖口會另外用釦（cuff link）或者絲帶扣（silk knot）扣好，而唔係用一般連埋紐嘅恤衫。
女裝恤衫（blouse）同男裝恤衫唔同，冇咁長之餘，唔使亦都唔能夠束入條褲度，亦唔使扣起個領度啲鈕。現代女性有時會着高質純白色T恤嚟代替恤衫。
襪
[編輯]襪應該同長西褲顏色一樣，咁會令對腳顯得更修長，亦都令到唔夠長嘅西褲管冇咁顯眼。一般顏色有黑色、灰色、海軍藍。如果冇相同顏色嘅襪，襪就應該深色過條西褲，以達到類似效果。有圖案嘅襪，底色應該同件套裝嘅顏色相配。如果同唔到條西褲襯色，可以考慮同對鞋襯。
其他配飾
[編輯]係咪纜皮帶係個人選擇，但係應該同對鞋相襯，一般有黑色、啡色咁。淺啡色嘅皮帶比較適合非正式商務服裝。皮帶扣應該係金色或者銀色。套裝其他金屬配飾，好似袖釦、呔夾、錶等等，應該同個皮帶扣襯返。對鞋唔應該橡膠底，最好係皮鞋，優質皮鞋可能會用木嚟整鞋踭。
一般嚟講，金屬錶越薄就越正式，指針錶就正式過電子錶。最莊重嘅場合甚至唔應該戴錶，而應該帶駝錶，但今時今日並唔多見。
胸袋放手巾仔已經唔再係常見嘅裝束。如果有就應該襯返件恤衫嘅顏色，係絲質就最好，顯示着個人嘅階級，但係一般棉質或者麻質嘅手巾仔都得。摺嘅方法就隨得著衫個人決定。
文化含意
[編輯]20世紀，歐洲嘅政治同社會地位喺世界各地都屬強勢，所以西裝成為咗通行世界各國嘅商務同正式服裝。因此，拒絕着西裝就可能成為咗反對歐洲或者主流文化嘅象徵。一啲非洲或者中東國家嘅領導人，會着返自己國家嘅民族服裝代替西裝，或者好似古巴嘅卡斯特羅咁着軍裝嚟代替。另外，伊朗嘅艾哈邁迪內賈德總統雖然會着西裝，但係件恤衫就開口兼唔打呔，都係由於同類原因，而唔係粗心大意。
現代華人社會多數接納着西裝做正式服飾。西裝喺1840年代左右傳入中國，初時多數由出國商人或者出國留學生着。19世紀末，上海等地嘅中式裁縫開始改做西裝。1919年嘅新文化運動入面，西裝衝擊咗傳統嘅長袍馬褂；之後西裝廣泛流傳，中國嘅西裝業亦都蓬勃發展[2]。不過中國嘅政治人物要到20世紀後期至開始着西裝。
香港嘅立法會議員、四五行動成員梁國雄，係少數至今仍然拒絕着西裝而知名嘅華人政治人物。立法會嘅《議事規則》第42條訂明：「議員進出立法會會場，在衣飾及舉止上須保持莊重」，多數議員會着西裝嚟出席會議。梁國雄喺2004年成為第三屆立法會議員之後，堅持繼續着返平時嘅圓領圖案T恤，被主席范徐麗泰認為違反以上嘅議事規則[3]。最後，議事規則委員會認為冇需要就「衣着莊重」講明定義，即係同意着圓領T恤唔算唔莊重[4]。梁國雄到依家都重係冇着過全套西裝開會，只會喺個別時候喺件T恤上面笠件西裝褸。
資料來源
[編輯]- ↑ 〈套裝[失咗效嘅鏈]〉，載《中國大百科全書智慧藏》，2006年6月30日存取。
- ↑ 〈西裝[失咗效嘅鏈]〉，載《中國大百科全書智慧藏》，2006年6月30日存取。
- ↑ 〈范太長毛為T恤激辯〉，載香港《明報》，2004年10月7日。
- ↑ 〈長毛衣著不算不莊重 田少讚圓領T恤夠潮〉，載香港《明報》A20版，2004年11月12日。
- POST, Emily（1922年），The Clothes of a Gentleman，載《Etiquette》第XXXIV章。
- 《GQ雜誌》：Style Guy: Suits and Blazers，提供男性着西裝外套品味嘅資訊