視像助理球證

出自維基百科,自由嘅百科全書
(由視頻助理球證跳轉過來)
跳去: 定向搵嘢

視像助理球證英文Video assistant referee縮寫VAR),又叫視像助理裁判,係足球比賽透過視像即時重播同通訊系統協助主球證執法嘅裁判員,當遇到有爭議性問題,球證可以要求睇重播,目前VAR重喺試驗階段,喺部分比賽試行緊,不過並唔係強制性。

喺任何情況之下,比賽會由主球證主持,球證或VAR都可以要求睇重播,但係球員同教練唔可以要求暫停比賽而使用VAR。VAR只會為明顯錯誤嘅決定提供協助,若果透過鏡頭都無法清楚判決,最終都要交由主球證決定。

情況[編輯]

遇到以下四種情況球證可以要求睇重播[1]

  • 入波:個波係唔係過嗮成條白界、懷疑有球員越位或犯規在先,決定入波係唔係有效。
  • 十二碼:決定應該要判罰十二碼嘅犯規
  • 紅牌:懷疑球員有要罰紅牌嘅犯規行為(唔適用於兩黃一紅)
  • 認錯球員:球證畀錯黃牌或紅牌第二個球員

要推翻球證原來判決嘅準則係發生咗「清楚嘅錯誤」,有時會擴大到「清楚同明顯嘅錯誤」[2]

視像助理球證會喺一間裝有幾部熒光幕嘅房睇有關重播。整個程序可以喺主球證主動要求之下啟動,或者由視像助理球證檢查有關比賽過程來決定係唔係通知主球證應該要啟動整個程序。喺呢個情況之下如果視像助理球證並冇發現異常嘅地方,就唔會透過通訊系統通知主球證;若果視像助理球證相信比賽過程中出現可能嘅錯誤,佢就會將有關情況通知主球證,主球證可以選擇:

  1. 基於視像助理球證嘅建議改變先前嘅判決;
  2. 去到球場邊線嘅特定位置透過指定熒光幕睇重播;
  3. 決定維持原判。

球證可以暫停進行緊嘅賽事以接收視像助理球證嘅意見或去到邊線睇重播,但係唔應該喺任何一方有明顯進攻優勢嘅時候進行。

當球證示意睇視像重播或指示經由視像重播之後改變原先判決嘅時候,應該以食指畫出長方形嘅外型(意思係熒光幕)。球員做出相同手勢要求睇視像重播會被黃牌警告。球員進入球證睇視像重播嘅區域都應該要被黃牌警告,而任何球隊職員進入呢個區域會被驅逐離場。

視像助理球證要係現任或前任球證,佢哋嘅位置可能會喺進行比賽嘅球場裏面或其他位置。

出面網頁[編輯]

參考[編輯]

  1. "Video Assistant Referees (VARs) Experiment - Protocol (Summary)" (PDF). 國際足球協會. 26 April 2017. 喺26 April 2017搵到. 
  2. Podcast, Planet Futbol. "Howard Webb on video replay and its future in soccer". SI.com. 喺26 April 2017搵到.