豬仔包

豬仔包係一種港式麵包，被認為係長條型法國麵包嘅短版本，又叫短法包，佢嘅味道同質感有相似上嘅地方，但唔係完全一樣。雖然佢叫做「豬仔」，但實際並無任何豬肉成份，亦無任何餡。常見喺香港同澳門嘅麵包舖同茶餐廳。

豬仔包呈橢圓形，佢嘅外型同豬仔有啲似，所以得到咁嘅名。傳統上，豬仔包可以按表面嘅鬆脆程度同硬度分為「硬豬仔包」同「軟豬仔包」；亦可以根據佢嘅味道而分為「甜豬仔包」同「鹹豬仔包」。

食法

除咗法式食法之外，豬仔包重有好多種食法，例如澳門著名嘅豬扒包，就係用豬仔包夾住一塊炸豬扒而成，而奶油豬仔包就係源自奶油多士，以經烤焗至香脆嘅豬仔包，搽上煉奶同牛油，亦係一種常見嘅食法。

奶油豬仔包，又叫奶油豬、奶油脆豬。係蛻變自奶油多士，澳門豬仔包加牛油同煉奶就得。