西多士

出自維基百科,自由嘅百科全書
Jump to navigation Jump to search
典型嘅西多士
一款喺歐美餐廳供應嘅西多士
蛋汁烤西多士配生果
香港茶餐廳同埋快餐連鎖店嘅西多士,配上牛油同埋糖漿。

西多士英文French toast法文pain perdu,全名叫法蘭西多士,臺灣叫法國吐司,簡稱西多)係一種源自歐洲嘅麪包食品,到家已經喺美洲同埋亞洲都好普遍。製法係將蛋、奶,或者再加入果汁同埋調味料打成漿液,將麪包浸入漿液之後,再撈起放入油裏面,煎或者炸到金黃色製成。食嘅時候通常會喺表面加上牛油糖漿煉奶忌廉、糖、果醬、香草甚至生果。製作方法同埋食嘅時候加嘅配料,唔同地區都會唔同。

起源[編輯]

西多士嘅起源,可追溯至羅馬帝國時期[1]。喺歐洲流傳期間,曾經有過唔同嘅名,但最後以(英語:Fretoast)最為普及,被翻譯成中文「法蘭西多士」。

西多士嘅出現相信同早年嘅人唔想嘥嘢食有關[2],於是就將食剩而變到唔新鮮嘅麪包,加入雞蛋煎至金黃色後竟然變得美味,就噉產生咗呢種食物。其後西多士更加入唔同嘅調味料同埋水果,令到西多士成為可口嘅食物。後來唔單止喺歐洲普及,更加傳入北美洲同埋亞洲,成為一種普及食品。

各地嘅西多士[編輯]

歐美[編輯]

西多士係北美洲同埋歐洲部份地區常見嘅早餐食物,主要作為早餐或者下午茶嘅茶點。西多士亦都可以加上雪糕而成為一道甜品。歐洲同埋美國嘅西多士做法相似,歐洲常見嘅西多士主要使用法國麪包製作。當麪包浸入蛋汁之後,就會放入煎鍋用油輕煎,令到麪包兩面呈現淡淡嘅金黃色。食用之前可以塗上糖漿或者果醬,亦可喺表面撒一啲肉桂粉。西多士亦可以配上水果一齊食,喺表面塗抹鮮忌廉之後,再加上士多啤梨藍啤梨或者車厘子之類嘅水果,都係歐美地區常見嘅食用方法。

臺灣[編輯]

臺灣稱為法式吐司,主要使用吐司麪包或厚片吐司製作。一般將吐司雙面沾上蛋汁後,用平底鍋輕煎兩面至金黃色。如果使用厚片吐司,通常會切成塊狀裹上蛋汁之後油炸,令到吐司內酥鬆外香脆,然後切成方塊狀上檯。上檯之後會淋上煉乳、蜂蜜。如果搭配水果就係「法式水果吐司」[3]。受到美式文化影響,亦有將幾片薄片法式吐司疊起(或夾餡),灑上糖粉,好似美式鬆餅咁去品嚐[4]。。

香港[編輯]

西多士傳入香港成之後,揉合咗中西方嘅飲食文化,轉變成另種特色茶點,成為港式茶餐廳最受歡迎嘅早餐同埋下午茶小食[5]。同傳統歐美西多士嘅大分別,係麪包唔係輕煎而係用油炸到金黃香脆。最常見喺用一塊西多士上檯,有啲茶餐廳會用兩塊西多士中間夾花生醬[6],有啲會加上芝士火腿同埋香蕉。上檯之後,搽喺西多士表面最常見嘅配料係牛油、糖漿同埋煉奶,部分會提供花生醬果醬朱古力醬或者咖央(一種由東南亞 / 南洋傳來的醬)[7],無一定嘅標準。

健康飲食[編輯]

西多士係香港人至愛嘅茶餐廳小食[8],但係由於麪包吸油同埋經過煎炸,係高脂肪同埋高熱量嘅嘢食[註 1],再加上喺西多士上面搽嘅牛油、淋嘅糖漿同埋煉奶、花生醬之類,熱量就更加高[註 2],並唔係健康嘅食物,所以唔適宜經常食用。

無聊嘢[編輯]

2003年3月,由於法國反對美國入侵伊拉克,美法關係惡化,美國國會唔妥法國,喺國會山莊裏面嘅餐廳,餐牌裏面同法國有關嘅食物,一度啲名改晒[4]。其中「法式多士」(英文:French toast)改做「自由多士」(英文;Freedom toast[註 3]),直至嗰年九月先改返原名。

相關節目[編輯]

香港ViuTV嘅飲食娛樂資訊節目《今晚趁熱食》,喺第6集「美味攻略」嘅環節,介紹過西多士金黃脆秘技,方法係用鴨蛋取代雞蛋,再加入椰漿肉桂粉同埋鮮橙汁打成漿,用麪包醮透之後油炸,製作成嘅西多士色澤會更金黃、口感更香脆[10]

[編輯]

  1. 根據USDA營養成分表,每100克西多士熱量係229大卡、脂肪11克、膽固醇116毫克
  2. 一份西多士熱量達到531大卡[9]
  3. Toast 有咗嘅意思,Freedom toast 就係自由玩完噉解

參考[編輯]

  1. Joseph Dommers Vehling, trans., Apicius: Cookery and Dining in Imperial Rome, Book VII, chapter 13, recipe 296 full text at Gutenberg
  2. "邪惡飲食地圖系列!香港西多士地圖". 新假期. 2015-04-17. 喺2020-08-03搵到.
  3. "法式水果土司". 自由時報. 2016-09-08. 喺2020-08-03搵到.
  4. 4.0 4.1 "法式吐司不是法國菜?一開始也不是用吐司做的?". 自由時報. 2019-08-01. 喺2020-08-03搵到.
  5. "調查:西多士成茶餐廳最受歡迎小食 加紅豆冰要跑12公里「贖罪」". 香港01. 2019-07-17. 喺2020-08-02搵到.
  6. "KEA 西多士無花生醬食客高呼「中伏」! 網民反指:正常西多士係無花生醬KEA 西多士無花生醬食客高呼「中伏」!". ezone. 2019-06-17. 喺2020-08-03搵到.
  7. "茶餐廳小食 融合中西". 臺灣蘋果日報. 2010-11-29. 喺2020-08-03搵到.
  8. "healthyD 公佈「至愛港式飲品小食調查」結果…". healthy:D. 2019-07-16. 喺2020-08-02搵到.
  9. "【食是食非】快餐店卡路里!10款下午茶食物陷阱!". 新假期. 2018-02-02. 喺2020-08-02搵到.
  10. 今晚趁熱食-港式大排檔素食

睇埋[編輯]