貝特曼原理

貝特曼原理（粵拼：bui3 dak6 maan6 jyun4 lei5；英文：Bateman's principle）係有關進化生物學同性選擇嘅一個概念，最基本個諗頭係話雄雌兩性因為喺配子上有差異，所以公傾向想同大量嘅乸交配，而乸就傾向想要數量少但質素高嘅配偶。

簡史

查理斯·達爾文（19 世紀）已經有喺度講，話發覺近乎一切動物物種都有一種情況：公硬係會性慾強過乸；啲公會為咗爭奪同啲乸交配嘅權利而打交，或者以其他方式競爭，亦會想喺啲乸面前展示自己幾咁有吸引力。例如好多物種嘅甲蟲都係啲公有角而啲乸冇角，公彼此之間會用角打交，打贏咗嘅就有權同啲乸交配。類似噉嘅情況喺好多種魚類、雀鳥以至哺乳類當中都可以觀察得到。

實驗

喺 1948 年，有生物學家做咗一場實驗：佢哋發覺一隻果蠅公嘅配偶數量愈多，生到嘅後代嘅數量就愈多；相比之下，乸就冇噉嘅情況—就算一隻乸有好多配偶，佢生到嘅後代嘅數量都唔會點升。首先，思考公同乸嘅生物本質—乸嘅配子（卵子）明顯大粒過公嘅（精子），例如人類卵子喺容量上估計係人類精子嘅 1,000 萬倍咁多，噉就表示對於身體嚟講，生產卵子（同生產精子比起嚟）消耗嘅資源更多，而且喺多種動物裡邊，乸要花好多時間陀仔（例如人類生仔就要陀九至十個月咁耐），陀仔期間隻乸冇得繁殖；相比之下，公生產後代嘅能力唔受呢種限制。因此，公比較有誘因靠住「盡力搵乸交配，交配次數有咁多得咁多」嘅策略嚟行動，而乸繁殖機會有限，對配偶會比較揀擇，偏向揀高質素嘅伴侶，亦會投注更多資源落去每個後代嗰度。

睇埋

• 誠實訊號
• 求偶