踎廁

法國製踎廁

香港嘅不鏽鋼踎廁

日本製踎廁。注意正確使用方向，人應該面向水箱。

踎廁係廁所嘅一種。用者需要踎低咁用佢。另一種廁所係坐喺度用嘅坐廁。

踎廁喺某啲地方並唔常見。西方某啲國家（例如 英國同美國）幾乎完全冇踎廁，但喺某啲地方（如中國大陸）踎廁反而係主流，而日本嘅和式廁所就已經漸漸俾西式嘅廁所所代替。

有啲人可能成世人幾十年都從未見過踎廁，第一次面對嘅時候可能會不知所措。但都有啲人習慣咗用踎廁，所以就算見到坐廁都照樣踎喺個坐廁上面，咁就可能會造成危險同埋破壞啲廁具啦。

歷史

喺印度河流域文明摩亨佐-達羅同哈拉帕遺址中，考古人員發現咗最早嘅踎廁，直通地下嘅排水道。

使用方法

正確嘅使用方法如下：

1. 注意使用嘅方向。用踎廁嘅時候，你個背脊應該靠住有個窿通向下水道嘅一邊。倘若個窿係喺接近牆嘅一邊，人就應該面向外。倘若個窿係喺遠離牆嘅一邊，人就應該面向牆嘞。
2. 將條褲除低，或者將條裙拉高
3. 將底褲除到膝頭哥位置
4. 踎喺踎廁上面，屁股應該盡量接近同埋瞄準踎廁個窿，如果唔係啲屎屎尿尿會彈到周圍都係
5. 過程中要小心保持平衡，初哥可以掹住扶手或者用手㩒住地下。
6. 如果冇信心，而時間許可，可以考慮先除底下身嘅衫褲，掛喺門上面先開始痾

評價

認為踎廁較佳嘅意見

• 踎喺度對腸臟蠕動、增強胯部肌肉有幫助，可以減少便秘、痔瘡等問題（但未經醫學證實）
• 踎廁使用過程中唔會彈起水花，比較乾淨衞生
• 踎廁清潔容易，價格較低；維修較少，亦冇咁易損毀
• 踎廁沖水用水比較少
• 踎廁鼓勵快上快落，增加流動，減少去廁所睇報紙揼波鐘等阻人行為（但用慣踎廁嘅人照樣可以踎住睇幾十分鐘報紙而面不改容）
• 用踎廁時唔使同廁所有肌膚之親，減少任何感染嘅機會（但一般相信廁板接觸都唔會傳染疾病）
• 公共廁所用踎廁會比坐廁乾淨
• 肛門口可以擘大啲，有助有排便困難嘅人
• 冇廁格嘅踎廁，方便閒談交流解悶，一齊煲煙等
• 踎廁排水力較強，容易清理入面嘅污漬

認為踎廁較差嘅意見

• 使用踎廁容易唔小心失平衡跣親
• 瞄準欠佳會整污糟個廁所同地下
• 膝頭哥有風濕嘅人，或者老人家都唔方便用
• 體型龐大，肥胖，孕婦，血虛頭暈者都不宜使用
• 容易俾啲彈起嘅污糟嘢整污糟隻腳
• 踎廁使用過程中啲屎暴露喺空氣時間較長，因此會比較臭
• 廁紙唔可以掟落踎廁，係要掟落垃圾桶