躝癱

躝癱（拼音為 laan1 taan2，拉艱切坦），顧名思義即係話一個人身體有問題，唔可以用腳行要喺地下躝爬，同癱咗唔行得一樣咁慘。呢個詞語係出自香港藝人周潤發（發哥）當年嘅一齣電視劇《網中人》，係「發哥」喺劇裏面用嚟鬧人嘅口頭禪。而自此之後，呢個詞語就變成普遍用嚟鬧人嘅粗俗詞語。

「躝癱」同「攔坦」非常相似，但追溯返攔坦一詞，喺中國北方或者台灣等嘅地方係解釋為用石頭堆高嘅石圍牆或者石籠，用嚟阻擋外來嘅干擾或者猛獸嘅侵襲，主要係愛嚟飼養家畜；有話「企喺攔坦之上唱山歌」，體現咗以前嘅農民喺休閒時候嘅娛樂。有一說話「躝癱」應寫做蘭彈，乾隆嗰時嘅《吳下方言考》有句詩：「兔子死蘭彈」，之後用嚟鬧人冇責任感嘅軟皮蛇。至於「躝癱」係取材自乜，呢層就暫時無從稽考嘞，但係喺香港，呢個詞語經過「發哥」演釋之後，即刻傳遍大街小巷，又因為「發哥」喺套電視劇入面個形象爛撻撻好冇文化，於是呢個詞語逐漸變成話嗰啲「行事粗魯冇禮貌、冇教養同埋冇文化」嘅人。

引申用法

後嚟，有香港人將呢句俗語同巴基斯坦撈埋一齊，變咗「巴基躝癱」，用嚟取笑居港嘅巴基斯坦人，以至所有巴基斯坦籍人士。呢句俗語帶有嚴重侮辱同埋種族歧視嘅成份，情況同香港人叫印度人做「阿差」差唔多（基本上，香港人普遍叫印巴籍人士做「阿差」）。

睇埋

• 粗口