轉車證

多倫多公車局巴士發嘅轉車證

多倫多地下鐵發嘅轉車證

轉車證（英文：transfer，英文讀音：/ˈtransfɚ/）喺一啲地方，例如美國同加拿大，係一種類似車飛嘅嘢，目的係證明你幾時上車（日子同時間，亦可能有其他資料，例如上車地點、行車方向、路綫名或者路綫號碼等等），等轉車嗰陣司機或者稽查員知道你已經畀咗錢或者有免費轉乘優惠，唔再收你第二次錢。

雖然話轉車證上面有齊資料，但係唔表示啲資料係畀人睇嘅，可能要搵部機先讀得出都未定，亦可能部分資料係司機先識睇。

同車飛嘅分別

轉車證同車飛概念上好似，有時亦可以係同一樣嘢，例如有啲地方會喺張車飛度打齊相關資料，張飛就變成轉車證；例如 YRT Viva 就曾經用過咁嘅方法。

不過車飛同轉車證亦未必係同一樣嘢；例如喺多倫多公車局，如果用車飛畀錢，就要擺低張車飛，然後換張轉車證，車飛唔可以當轉車證用。

其他限制

用轉車證通常有時限，但係亦可以有其他限制。例如多倫多公車局嘅轉車證，限制係喺合理嘅時限之內，相同方向搭一程車，喺 ｢轉車地點｣（transfer point）轉車，唔准 ｢停｣（stopover），但係其實呢個限制入面大部分嘅字眼都從來冇定義過，司機可以隨意屈個乘客車程太長、唔係同一方向、喺錯嘅巴士站轉車、去咗第度等等，好多方法可以迫個乘客畀兩次錢。