辱華

辱華，喺唔同情境同時空脈絡下，指對中華人民共和國、中國人或者華人嘅羞辱。但呢個字眼好視乎對『羞辱』以致『華』呢兩個詞語嘅定義。有啲人甚至會將對中國政府嘅批評，都視作辱華。近年中國民族主義崛起，中國大陸網民對其他人更頻密咁批評話佢哋辱華。而喺香港同台灣，有啲人反而會用呢個字眼，批評同揶揄中國大陸嘅小粉紅心靈脆弱，乜都講到係辱華，上綱上線。另外，被中國網民批評嘅人，除咗一啲相對於北京政府持有唔同政見嘅政治人物之外，就連一啲唔關事，甚至認同北京政權嘅藝人都曾經被中國大陸網民話佢辱華。

中國網民指控辱華但有爭議嘅事例

香港

• 2016年立法會宣誓風波入面，有6名立法會議員被政府剝奪資格，其中包括姚松炎。其中有部分人的確用咗比較具爭議性嘅字眼，但有啲人就混為一談，連當時姚松炎其實只係喺誓詞入面加入可持續發展等同佢政綱有關嘅內容，都有一啲親中派嘅媒體同網民，刻意散播假新聞，話佢辱華。
• 喺2021年，莫文蔚推出《婦女新知2021》，但去到6月嗰陣被揭發呢首歌嘅MV入面，莫文蔚D&G品牌嘅衫，而D&G之前就曝出辱華事件。就算莫文蔚之前表達過對北京政府嘅認同或者參與一啲中國國慶活動嘅表現，都仍然被網民狙擊話佢辱華。莫文蔚之後發表道歉聲明亦都無人理，就連《環球時報》總編輯胡錫進網上幫莫文蔚解圍，都引發網友嘲諷。
• 喺第32屆奧林匹克運動會期間，何超蓮喺社交媒體上載咗一張包含多位香港同埋中國奧運代表選手嘅拼圖，亦被中國內地網民批評點解冇包含台灣嘅選手，甚至有人話佢辱華。

台灣

• 喺第32屆奧林匹克運動會期間，有啲台灣藝人，包括范瑋琪、徐熙娣、蔡依林、徐佳瑩、魏如萱同埋吳映潔等，因為支持台灣奧運選手而被一啲中國大陸網民攻擊，話佢哋支持台獨或者辱華。就算有啲藝人已經避重就輕，唔提及「中華台北」或者台灣等字眼，一樣避唔過中國網民嘅欺凌。事件引嚟台灣跨黨派譴責，而台灣文化部就以「沒有一位藝人，需要為了支持自己國家的選手而道歉」，寫文力撐台灣藝人。民進黨立委陳亭妃形容，中國係用緊抄家滅族嘅方式審查言論，希望所有藝人睇清楚。

澳洲

• 2021年3月，澳洲國立大學校內畫廊 aMBUSH Gallery展示咗一張喺毛澤東肖像加上「蝙蝠俠」面罩嘅 10 元人民幣，揶揄武漢濕貨市場係武漢肺炎嘅源頭。另外一張印有小熊維尼緊抱著死去跳跳虎嘅人民幣，用以批評北京政府進行維吾爾族種族滅絕嘅措施，仲有一張以人臉識別系統嘅方框對準毛澤東頭像，批評中國實施嘅社會信用制度。雖然批評對象係中國嘅政權，但仍然被當地中國留學生投訴，話個畫家辱華。

對於中國網民經常性話其他人辱華嘅評論

• 喺香港，有啲人揶揄，類似指控同新聞久不久就出現，簡直多到可以編一本叫做《So 辱華》嘅書。有啲人亦認為，呢啲指控段新聞除咗反中國極端民族主義同玻璃心，亦發現中國網民固執同拒絕聆聽其他人嘅意見
• 亦有啲人揶揄人生必然經歷五樣嘢：生、老、病、死、辱華。

濕碎嘢

• 香港藝人蘇玉華由於個名『玉華』同『辱華』同音，而『So』亦有『非常』嘅意思，所以有啲香港人討論到辱華，甚至係蘇玉華本身嘅話題上，會攞佢個名嚟作為一個爛Gag。
• 有啲人會借用近音嘅「乳滑」一詞，代替「辱華」。