蔡依林

蔡依林
蔡依林（2018年4月）
女藝人
原名	蔡依翎
羅馬拼音	Tsai I-lin
英文名	Jolin Tsai
粵拼	coi3 ji1 lam4
花名	少男殺手 流行教主 呸姐 國際蔡
國籍	中華民國
民族	漢族
出世	蔡宜凌 (1980-09-15) 1980年9月15號  中華民國臺灣省臺北縣新莊市 （新北市新莊區）
屋企	臺北市
職業	歌手 詞曲作家 演員
語言	國語 英文
教育程度	學士
母校	私立輔仁大學
音樂類	流行 舞曲
出道地	臺北市
出道日期	1999年7月16號 (1999-07-16)
活躍年代	1999年開始
唱片公司	環球音樂（1999年 - 2001年） 新力音樂（2002年 - 2005年） 百代音樂（2006年 - 2008年） 華納音樂（2008年 - 2018年） 索尼音樂娛樂（2018年 - ）
經紀公司	凌時差音樂
網路電影資料庫（IMDb）資訊
獎 十大中文金曲頒獎典禮 全國最受歡迎歌手獎（女歌手銅獎） 2006年 金曲獎 觀眾票選最受歡迎女（團體）歌手獎 2007年 年度歌曲獎 2007年 《今天妳要嫁給我》 2013年 《大藝術家》 2019年 《玫瑰少年》 年度專輯獎 2019年 《Ugly Beauty》 最佳華語女歌手獎 2007年 《舞孃》 最佳華語專輯獎 2015年 《呸》 MTV亞洲大獎 時尚風格大獎 2006年 中歌榜 年度最受歡迎女歌手（港台） 2008年 年度金曲 2008年 《日不落》 其他獎 完整一覽

蔡依林（粵拼：coi3 ji1 lam4，英文：Jolin Tsai；1980年9月15號—）係一個臺灣歌手、詞曲作家同演員，原名蔡宜凌，又叫蔡宜翎同蔡依翎；佢喺1999年出道。佢唔單止擅長唱歌跳舞，而且成個亞洲都出名，重有好大影響力，因此有「亞洲流行天后」嘅稱呼。佢因為不斷創新自己嘅音樂風格同視覺形象而出名，而且響大中華地區成功得到足夠強大嘅知名度同埋粉絲基礎。佢今時今日已完全掌控自己嘅演藝事業，而且為咗推動流行舞曲成為大中華區主流音樂做出咗重大貢獻。佢嘅音樂作品包括社會議題同思想內涵，而且響市場同口碑方面亦都得到巨大成功，亦係華語樂壇當中最為出色嘅唱跳歌手。

喺臺灣娛樂圈裏面，蔡依林同張韶涵、王心凌、楊丞琳畀當地媒體叫做「四大教主」。

背景

1980年9月15號，蔡依林喺臺北縣新莊市（家下新北市新莊區）嘅一個普通家庭出世，佢阿爸叫蔡柱陳，阿媽叫黃春美，上頭有一個家姐蔡旻紋，之後佢哋兩個人離咗婚之後，佢阿爸又同另一個泰國女人生咗兩仔；不過因為佢個阿婆係臺灣原住民拍瀑拉族（Papora people）嘅混血，所以佢都有四分之一嘅原住民血統。

由於蔡依林喺高中時期都幾活躍，而且鍾意唱歌同運動。1998年7月，佢參加MTV電視台所舉辦嘅歌唱比賽節目《新聲卡位戰》，翻唱Whitney Houston所演唱嘅英文歌《The Greatest Love of All》打敗咗三千個選手，而且成功攞到冠軍之後先至入行，所以歌手就係佢嘅第一份工作。

歷經雪藏糾紛之後，蔡依林成功過檔到新東家，佢通過不斷努力同埋創新嘅精彩表現，仲得到其他唱作人同埋外國舞者嘅垂青。2009年蔡依林加入咗臺灣電視製作人葛福鴻所成立嘅凌時差音樂公司，即係由王永良（Tom Wang）做佢經理人，全面主導個人音樂事業。

2009年以後，蔡依林響《福布斯》雜誌當中嘅「福布斯中國名人榜」便有六次攞到綜合排名前20名，其中三次仲得到華人女歌手綜合排名第一。2014年11月，臺灣《壹週刊》報導話蔡依林嘅身家經已超過新臺幣20億元。

音樂事業

1999年－2001年：環球音樂

1999年3月，蔡依林同環球音樂簽約，成為唱片公司力捧嘅年度重點新人。同年7月16號，佢嘅第一首個人單曲《和世界做鄰居》開始發行。同年9月10號，蔡依林出咗第1張錄音室專輯《1019》；由於唱片公司以乖乖女風格形象作為號召，加上天真純品嘅特質，於是令到佢有「少男殺手」嘅稱呼而一舉成名，當時佢即以「學生歌手」嘅身份正式出道，而且首次出碟即有45萬張嘅銷量；同年12月4號，蔡依林喺臺灣臺北市南港101舉辦「1019我可以演唱會」。

2000年3月16號，蔡依林發行現場影音專輯《1019我可以演唱會 實錄伴唱》，呢隻碟收咗蔡依林嘅「1019我可以演唱會」現場表演內容；同年4月26號，蔡依林發行第2張錄音室專輯《Don't Stop》亦都有50萬張嘅銷售成績；同年12月22號，佢嘅第3張錄音室專輯《Show Your Love》開始發行。

2001年7月7號，蔡依林發行第4張錄音室專輯《Lucky Number》；呢隻碟喺臺灣嘅銷量超過15萬張，年度排名去到第19位；同年8月，蔡依林因為合約問題同大聲音樂（經理人公司）負責人吳大衛引發財務糾紛，對方要求佢哋喺三日內公開道歉，如果唔係就要賠1000萬新臺幣（大約250萬港元）。同年11月6號，環球唱片幫蔡依林發行精選輯《Together》；同年12月3號，蔡依林被控涉嫌違約嘅官司喺臺北地檢署第一次開庭，不過大聲音樂覺得係蔡依林片面毀約，所以決定求償2700萬新臺幣（大約650萬港元）嘅罰款。由於當時蔡依林喺國外仲未返嚟，因此呢件事就係佢老竇蔡柱陳出面解決。

2002年6月，法庭判決蔡依林終止合約有效，所以佢同大聲音樂解約而賠咗9百萬之後就開始同經理人葛福鴻簽埋新合約，演藝事業就此轉變。

2002年－2005年：新力音樂

2002年7月，蔡依林正式轉投新力音樂（Sony Music），佢響一段時間之後參與咗電視劇《Hi 上班女郎》嘅拍攝；呢套戲即係佢同臺灣男歌手羅志祥一齊做主角。同年8月2號，蔡依林推出寫真書《假面公主·騎士精神》，呢本書喺臺灣發行之後嘅兩星期就已賣咗超過5萬本。

2003年3月7號，蔡依林推出咗第5張錄音室專輯《看我72變》。呢張唱片主要係根據蔡依林嘅音質、唱腔、定位同潛能度身訂做，而且由音樂人王治平、薛忠銘、周杰倫、李偲菘同黃怡監製，融合流行、的士高、Funk、謠曲、Hip-hop同英倫搖滾等音樂風格，呢個作品令樂評人為之大讚，經過評價之後確認係佢定位轉型嘅關鍵作品，即係以舞曲為主導嘅音樂方向。呢張唱片蟬聯臺灣唱片銷量排行榜週度冠軍10週、臺灣同全亞洲嘅銷量分別超過36萬張同150萬張；包括2003年臺灣年度唱片銷量第2名、2003年臺灣年度女歌手唱片銷量第1名、入圍第15屆金曲獎最佳流行音樂演唱專輯獎、最佳國語女演唱人獎，音樂人鍾興民憑住專輯入面嘅歌《布拉格廣場》入圍最佳編曲人獎；同月14號，環球音樂發行精選輯《純真年代 1999－2001全記錄》；同月19號，蔡依林主演嘅電視劇《Hi 上班女郎》響臺灣中視首播。同年4月10號，蔡依林演唱港產片《失憶𠝹女王》中文主題曲《愛的天使》同埋兩首插曲《我很怕黑》、《你為何》；同月12號，蔡依林喺臺南市政府前廣場舉辦「說愛你慶功演唱會」。同年6月14號，蔡依林喺私立輔仁大學畢業並獲得英國語文學系學士學位。同年9月10號，蔡依林演唱中國大陸電影《天地英雄》主題曲《海市蜃樓》；同月15號，蔡依林幫美國藝人Madonna所寫嘅《The English Roses》翻譯作中文，之後Madonna所寫嘅五本書都由佢整。

2004年2月27號，蔡依林發行第6張錄音室專輯《城堡》。呢隻唱片有30萬張嘅銷量、全亞洲總銷量超過150萬張，仲獲得2004年臺灣年度唱片銷量第2名、2004年臺灣年度女歌手唱片銷量第1名。

2005年4月25號，蔡依林發行第7張錄音室專輯《J-Game》，呢隻唱片有26萬張嘅銷量。

2006年－2008年：百代音樂

蔡依林宣傳新碟《特務J》活動現場

2006年2月16號，蔡依林同百代音樂簽約，同年5月5號，新力博德曼推出《J-Top 冠軍精選》，呢隻唱片喺臺灣嘅銷量超過10萬張，而且得到2006年臺灣年度專輯銷量第5名；特別係5月12號發行嘅第8張錄音室專輯《舞孃》，到咗出年5月入圍第18屆金曲獎最佳國語專輯獎、最佳國語女歌手獎，而且銷量超過26萬張，成張唱片音樂風格充滿驚喜元素同埋流行特色。

2007年9月21號，蔡依林發行第9張錄音室專輯《特務J》。同年10月21號，蔡依林響臺灣淡水漁人碼頭舉辦「特務J慶功演唱會」；同年11月21號，佢同澳洲歌手Kylie Minogue演唱嘅英文單曲《In My Arms》開始發行。

2008年10月31號，蔡依林出咗個第一張英文翻唱專輯《愛的練習語》（Love Exercise），成隻碟收錄10首英文歌。呢隻唱片仲獲得臺灣西洋唱片銷量排行榜第1名、銷量超過3萬張、2008年臺灣年度西洋唱片銷量第1名。包括佢寫嘅同名書本亦都賣出咗3萬本。

2008年－2018年：華納音樂

蔡依林響2008年台北電玩展，當時佢出席緊《唯舞獨尊 Online》嘅特別活動

TTJ捷運公車交通大使蔡依林廣告

2008年12月16號，蔡依林簽約華納音樂。2009年2月27號，金牌大風開始發行新歌加精選輯《J世紀 2006－2009大牌新曲+精選盤》。同年3月27號，蔡依林發行第10張錄音室專輯《花蝴蝶》；呢隻碟已超過12萬張預購量，仲成為臺灣史上專輯預購量最高紀錄。而且蟬聯臺灣專輯銷量排行榜週度冠軍6週，包括臺灣同全亞洲嘅銷量分別超過21萬張同100萬張，獲得2009年臺灣年度專輯銷量第1名。同月28號，蔡依林喺臺灣新竹市中華大學展開「花蝴蝶校園巡迴演唱會」，呢場校園巡演原計劃演唱10個場次；由於蔡依林喺巡演期間舊傷復發，因此佢演唱完4場之後即以取消咗其他場次。同年5月9號，蔡依林喺臺灣臺中市市民廣場舉辦「花蝴蝶慶功演唱會」。同月24號，蔡依林喺臺灣臺北市河岸留言舉辦「愈慢愈美麗慢歌演唱會」。同年10月9號，蔡依林發行現場影音專輯《單身情歌·萬人舞台 2009特別紀念版》，呢隻碟收咗蔡依林之前嘅「花蝴蝶慶功演唱會」同埋「愈慢愈美麗慢歌演唱會」嘅現場表演內容。

2010年8月13號，蔡依林發行第11張錄音室專輯《Myself》；呢張唱片銷量超過6.5萬張，而且成功得到2010年臺灣年度唱片銷量第4名、2010年臺灣年度女歌手唱片銷量第1名。專輯入面嘅歌《美人計》MV入圍第22屆金曲獎最佳音樂錄影帶獎。同年12月24號，蔡依林喺臺灣臺北市臺北小巨蛋展開第3輪巡演「Myself世界巡迴演唱會」，呢場巡演歷時兩年零四個月嘅時間，而且喺亞洲、歐洲同大洋洲31個城市共演唱35場次，觀眾人數超過60萬，票房超過新臺幣15億元。

2011年7月12號，蔡依林發行美容書《養瘦》；同年12月31號，蔡依林參加咗中國大陸湖南衛視舉辦嘅「快樂中國2011－2012跨年演唱會」，佢嘅表演時段係中國大陸最高收視時段最高嘅。

2012年8月28號，索尼音樂發行精選輯《J女神 影音典藏精選》；同年9月14號，蔡依林發行第12張錄音室專輯《Muse》。

2014年11月15號，蔡依林發行第13張錄音室專輯《呸》，呢隻碟喺臺灣銷量超過8.5萬張，仲成為2014年臺灣年度專輯銷量第4名、2014年臺灣年度女歌手專輯銷量第1名；包括入圍10項金曲獎、最佳國語專輯獎同埋最佳演唱錄音專輯獎，係金曲獎史上入圍最多獎項嘅專輯之一。

2015年2月3號，蔡依林同安室奈美惠合唱嘅中英文單曲《I'm Not Yours》開始喺YouTube頻道播出；同年5月22號，蔡依林喺臺灣臺北市臺北小巨蛋展開第4輪巡演「Play世界巡迴演唱會」，呢場活動歷時一年零兩個月喺亞洲同北美洲23個城市共演唱34場次，觀眾人數超過40萬；同年12月2號，蔡依林參加由韓國Mnet電視台舉辦嘅「第17屆Mnet亞洲音樂大獎」，得到最佳亞洲藝人獎。

2016年9月，蔡依林同瑞典音樂人Alesso合作推出英文歌《I Wanna Know》；出年7月，佢同荷蘭音樂人Hardwell合作推出電音單曲《We Are One》。

2018年開始：索尼音樂娛樂

2018年12月26號，蔡依林發行第14張錄音室專輯《Ugly Beauty》。呢張唱片響中國大陸銷量超過70萬張，仲成為港台女歌手數碼唱片銷量第1名、港台女歌手第1名同埋金曲獎八項大獎入圍嘅紀錄；而且佢之後亦都憑住呢張專輯入面嘅單曲《玫瑰少年》得到年度歌曲獎。

2019年12月30號，蔡依林開始響臺北市舉辦「Ugly Beauty世界巡迴演唱會」第5輪巡演。

2021年3月開始，蔡依林同荷蘭音樂人R3hab聯手合作推出英文單曲《Stars Align》。同年10月，佢同美國音樂人Steve Aoki、創作歌手MAX發行最新單曲《Equal in the Darkness》。

2022年1月7號，蔡依林已經透過主辦單位宣布全面取消咗「Ugly Beauty 2020 世界巡迴演唱會」嘅表演活動，主辦單位表示之後將睇返情況先至規劃。

榮譽紀錄

蔡依林一共入圍同獲得大量獎項。佢至今共入圍15次金曲獎，包括2次年度專輯獎（原本係最佳流行音樂演唱專輯獎）、4次年度歌曲獎、4次最佳華語專輯獎、4次最佳華語女歌手獎同1次最佳單曲製作人獎。佢至今共獲得7座金曲獎，包括憑住專輯《Ugly Beauty》獲得嘅1座年度專輯獎、憑藉歌曲《今天妳要嫁給我》、《大藝術家》同《玫瑰少年》獲得嘅3座年度歌曲獎、憑住專輯《呸》獲得嘅1座最佳華語專輯獎、憑住專輯《舞孃》獲得嘅1座最佳華語女歌手獎同1座觀眾票選最受歡迎女（團體）歌手獎。佢係金曲獎史上獲獎次數最多嘅華語女歌手，亦係金曲獎史上憑住舞曲為主嘅專輯入圍同獲獎次數最多嘅歌手，亦係金曲獎史上獲得年度歌曲獎次數最多嘅歌手。2014年專輯《呸》憑住入圍10項金曲獎成為金曲獎史上入圍獎項數目最多嘅三張專輯之一，另外兩張專輯分別係周杰倫嘅《范特西》同張惠妹嘅《阿密特》，而2018年專輯《Ugly Beauty》仲入圍8項金曲獎。

佢都好多次獲得其他中文音樂頒獎活動嘅獎項，包括北京流行音樂典禮、全球華人歌曲排行榜、全球華語榜中榜、全球華語歌曲排行榜、十大中文金曲頒獎音樂會、新城國語力頒獎禮、新城勁爆頒獎禮、新加坡金曲獎、音樂風雲榜、音樂盛典咪咕匯、CCTV-MTV音樂盛典、Hito流行音樂獎、IFPI香港唱片銷量大獎、KKBox風雲榜、Music Radio中國Top排行榜、My Astro至尊流行榜、TVB8金曲榜等，其中佢一共獲得Hito流行音樂獎8座Hito女歌手同8座Hito冠軍王（原本係年度蟬連冠軍最久單曲/專輯）、KKBox風雲榜10座年度十大風雲歌手、2010年音樂風雲榜十年最具影響力港台音樂人物同2016年音樂盛典咪咕匯十年最佳女歌手。

佢都曾入圍同獲得多個國際音樂頒獎活動嘅獎項，包括憑住歌曲《愛上了一條街》MV獲得2001年MTV音樂錄影帶大獎國際觀眾選擇獎、憑住歌曲《海盜》MV入圍2005年MTV日本音樂錄影帶大獎最佳亞洲藝人獎、獲得2006年MTV亞洲大獎時尚風格大獎、入圍2012年MTV歐洲音樂大獎最佳亞洲藝人獎、入圍2015年MTV歐洲音樂大獎最佳台灣藝人獎、獲得2015年Mnet亞洲音樂大獎最佳亞洲藝人獎等。2008年7月，佢獲得中華民國行政院勞動委員會舉辦嘅彩蝶獎頒發嘅彩蝶指標獎，肯定佢喺演藝界嘅傑出表現。

音樂作品

唱片

• 《1019》（1999年）
• 《Don't Stop》（2000年）
• 《Show Your Love》（2000年）
• 《Lucky Number》（2001年）
• 《看我72變》（2003年）
• 《城堡》（2004年）
• 《J-Game》（2005年）
• 《舞孃》（2006年）
• 《特務J》（2007年）
• 《花蝴蝶》（2009年）
• 《Myself》（2010年）
• 《Muse》（2012年）
• 《呸》（2014年）
• 《Ugly Beauty》（2018年）

影視作品

電視劇

• 《青春六人行》（2001年）
• 《來我家吧》（2002年）
• 《偷偷愛上你》（2002年）
• 《Hi 上班女郎》（2003年）

電影

• 《特務J》（2007年）
• 《優獸大都會》中文配音（2016年）

書

• 《Jolin的24堂英文日記課》（2005年）
• 《Jolin的6場單字派對》（2006年）
• 《愛的練習語》（2008年）
• 《養瘦》（2011年）

演唱會

• J1世界巡迴演唱會（2004年－2006年）
• 唯舞獨尊世界巡迴演唱會（2006年－2009年）
• Myself世界巡迴演唱會（2010年－2013年）
• Play世界巡迴演唱會（2015年－2016年）
• Ugly Beauty世界巡迴演唱會（2019年－2021年）

綜藝節目

• 愛奇藝《青春有你》（2019年）

廣告代言

• 臺灣啤酒
• Uber Eats
• 全聯福利中心
• OLAY
• PUMA
• Crest 美白牙膏

睇埋

• 華語流行曲
• 臺灣歌手一覽
• 臺灣最暢銷專輯一覽

出面網頁

• 蔡依林喺Allmusic上嘅文章
• 蔡依林喺Curlie嘅資料
• 蔡依林嘅Facebook頁
• 蔡依林嘅Instagram頁
• YouTube上面嘅Tsai 蔡依林嘅頻道
• 蔡依林喺互聯網電影資料庫嘅資料（英文）
• 蔡依林喺香港影庫嘅資料（繁體中文 - 香港）
• 蔡依林喺豆瓣電影嘅資料（大陸簡體）
• 蔡依林喺時光網嘅資料（大陸簡體）