周杰倫

周杰倫
周杰倫
男藝人
羅馬拼音	Chou Chieh Lun
英文名	Jay
花名	周董/Jay/哎呦哥哥
國籍	中華民國
出世	(1979-01-18) 1979年1月18號 中華民國臺北縣
職業	歌手、主持人、演員
配偶	昆凌
音樂類	Pop、Rap、R&B、中國風
出道日期	1997年 (1997)
出道作品	《Jay》
活躍年代	2000年至今
唱片公司	阿爾發音樂（1997 - 2007） 杰威爾音樂（2007 - ）

周杰倫（粵拼：zau¹ git⁶ leon⁴；Jay Chou，1979年1月18號—），花名周董，係臺灣出名男歌手，近年撈埋導演、演員呢範，響2016年仲做埋台灣LOL J Team嘅董事長。

早年

周杰倫1979年響台北縣林口鄉（即依家嘅林口區）出世兼大，老豆叫周耀中，係一個教國中生物科嘅老師；而阿媽葉惠美亦係教國中嘅，不過就係美術老師。因為老豆阿媽都係教書嘅，所以由三歲開始就成日彈琴，後來亦有學大提琴。

細個就住響光華商場附近，先後入讀忠孝國小同金華國中。但係響國中時期，老豆阿媽因為長年嘅爭拗，最後決定離婚，對周杰倫打擊幾大。最後判咗由老豆做佢監護人。但因為自細同阿媽感情好，所以響18歲嗰年選擇搬去同阿媽住。

高中時期升讀台北縣私立淡江中學音樂科（原先想報華岡藝校，但錯過報名時間，咁啱淡江中學新設音樂科），主修鋼琴，副修大提琴。後嚟因為大學聯考落榜，本身成績又唔係幾好，所以冇繼續求學；又因為有僵直性脊椎炎，所以唔使當兵。

周杰倫細個深受張學友嘅《吻別》影響，令到佢對流行音樂有興趣；另外亦深受李恕權同史提夫溫達影響，甚至每次當李恕權出現響電視上，周杰倫就會模彷佢嘅動作。

音樂生涯

初出茅廬（1997 - 1999）

吳宗憲可以話係周杰倫嘅伯樂。1997年8月，當時只有十八歲嘅周杰倫，因為佢高中同學參加TVBS嘅節目《超級新人王》，而做佢同學嘅鋼琴伴奏。雖然佢同學冇攞到獎，但係當時嘅節目主持吳宗憲一下子就睇中咗周杰倫對作曲樂譜嘅工整，認為佢係隻「潛力股」，因而同佢簽約，周杰倫從此進入樂壇。

吳宗憲好睇起佢，但希望佢經啲歷練，叫佢先專注作曲先再出唱片。雖然周杰倫好努力咁作曲畀其他歌手，但係由於佢嘅作曲風格並唔係當時嘅主流，因此好多首都畀人退歌，就好似劉德華嘅《眼淚知道》同埋張惠妹嘅《忍者》。雖然係咁，吳宗憲依然支持周杰倫，唔單止畀同公司嘅歌手唱周杰倫作嘅歌，仲多次帶佢上節目，響唔同節目入面幫周杰倫講好說話。

1998年，周杰倫作嘅歌《三暝三日》第一次畀其他歌手接咗，由吳宗憲唱。

1999年，由周杰倫作嘅唱碟《落雨聲》正式賣出，由江蕙去唱，係周杰倫作嘅歌入面第一次賣出去，亦係佢第一次同方文山（同樣係由吳宗憲發掘，不過係作詞）合作。因為今次合作得幾好，所以之後周就成日同方合作。

嶄露頭角（2000 - 2002）

雖然吳宗憲對周杰倫出道早期幫助好大，但真正令佢出名嘅人，係阿爾發音樂時任總經理楊峻榮。楊峻榮響一次偶然嘅情況下，聽到咗由周杰倫作嘅《可愛女人》試聽版之後，覺得佢已經達到可以出唱碟嘅水準，於是多次向吳宗憲請求，最後得到佢同意。2000年，周杰倫作咗50首歌，由吳宗憲揀其中十首，之後開始製作佢人生中第一隻自家唱碟。同年11月，《Jay》正式發行。由於《Jay》入面多首歌都唔係當時興嘅曲調，又用咗R&B、Hip Hop、古典音樂同中國風等多個音樂類型，令到佢開始有名同奠定佢嘅音樂風格，亦攞到第12屆金曲獎嘅「最佳流行音樂演唱專輯獎」。

2001年，佢嘅第二張唱碟《范特西》正式發行，個名嚟自英文「fantasy」。《范特西》一賣出就有好大回響，亦令到佢正式走紅。憑住呢張專輯，佢響同年嘅金曲獎一下攞咗「最佳作曲人獎」、「最佳專輯製作人獎」同「最佳流行音樂演唱專輯獎」等五個獎，另外亦得到2001年叱咤樂壇流行榜頒獎典禮嘅「叱咤樂壇我最喜愛的歌曲大獎」（《開不了口》）等等。

2002年發行第三張唱碟《八度空間》，雖然得到多個獎嘅提名，但係最後一個獎都冇攞到，成為佢嘅遺憾。同年9月，個人第一個巡迴演唱會「THE ONE」響台北市立體育場開幕。

個人專輯

周杰倫差唔多每年出一張個人專輯，而家已經出到第十四張，佢嘅專輯包括：

• JAY（2000年）
• 范特西（2001年）
• 八度空間（2002年）
• 葉惠美（2003年）
• 七里香（2004年）
• 十一月的蕭邦（2005年）
• 依然范特西（2006年）
• 我很忙（2007年）
• 魔杰座（2008年）
• 跨時代（2010年）
• 驚嘆號（2011年）
• 12新作（2012年）
• 哎呦，不錯哦（2014年）
• 周杰倫的床邊故事（2016年）

出面網頁

• 周杰倫網站
• 杰威爾音樂