鍾江海
鍾江海（1916年—2000年10月2號）係香港同南洋嘅生意人，由於佢喺香港起過唔少樓，尤其集中起工廠大廈，所以有「工廈大王」嘅美譽。
生平
[編輯]1916年，鍾江海喺福建安溪出世，早年佢老豆派佢去上海做生意，後來又去咗星架坡。到咗50年代，鍾江海嚟咗香港發展地產生意，當中代表作就係喺尖沙咀嘅總統酒店，重有同霍英東等人夾份起嘅星光行。當期時，鍾江海成日都拍住細佬鍾明輝一齊去投地起樓，佢哋又比較集中起工廈，所以鍾江海就有「工廈大王」嘅美譽。
到1980年代頭，香港嘅地產市道因為前途問題而變差，當時揸重貨嘅鍾江海同鍾明輝負債好多，而另一個細佬鍾正文更加牽涉入去佳寧案入面，結果三人被迫將凱聯酒店嘅股票押畀銀行同拋貨套現。到1983年，一直密密掃貨，以鍾輝煌為首嘅二房成功喺股東大會踢走鍾江海同鍾明輝[1]，得到凱聯嘅控制權。經過呢一件事之後，鍾江海有一排去咗台灣，到1988年返嚟香港。[2]而佢重有華廈置業一間上市公司，但發展步伐好慢。
鍾江海到2000年過身，享壽84歲。喺佢死後，大房及二房就開始爭身家，兩房人更加向對方大鬧粗口，最後二房打贏官司，繼續成為遺產信託執行人同鍾江海生前送畀二太秦蘭鳳嘅公司股權[3]。
家族
[編輯]鍾江海嘅老豆係鍾奕莊，佢係做珠寶學徒起家，後來長駐星架坡，喺當地有鴻福實業，阿媽係林配，鍾江海係兩人嘅嫡長子，鍾明輝、鍾正文係佢同父同母嘅親兄弟。
鍾江海有一妻一妾，大婆係林美，喺1977年2月過身；二房係秦蘭鳳。兩個老婆一共同佢生咗6個仔同10個女，其中一個女鍾寶珊就係前立法局議員梁錦濠嘅前妻，梁氏亦因為鍾江海同王德輝關係好好，繼而識到王氏，成為佢嘅契仔。[4]
鍾江海個孫係電競公司老闆、香港網絡紅人鍾培生。
睇埋
[編輯]參考
[編輯]- ↑ 〈凱聯酒店昨股東大會通過重新組織董事局 成員已由原來十八人減至十人 原任主席鍾江海由鍾輝煌代替〉。《大公報》。1983-07-01。頁 9。
{{cite news}}: CS1 maint: url-status (link) - ↑ 〈正室女兒爭產 昨庭上供稱 工廈大王晚年被繼室孤立 | 蘋果日報•聞庫〉。《聞庫》。2006-09-04。喺2022-09-15搵到。
- ↑ 〈「工廈大王」爭產案 元配一房落敗 鍾江海繼室保逾億元資產 | 蘋果日報•聞庫〉。《聞庫》。2006-09-22。喺2022-09-15搵到。
- ↑ 〈小甜甜契仔 賄選囚3年 - 香港文匯報〉。paper.wenweipo.com。原著喺2011-02-18歸檔。喺2022-09-15搵到。