長洲警署

長洲警署

長洲警署（官方名叫：長洲分區警署，Cheung Chau Division Police Station ）係香港警務處水警總區水警海港區長洲分區嘅警署，喺香港新界長洲警署徑4號。喺1988年被評為三級歷史建築，2009年12月18號改評為香港二級歷史建築。

史

20世紀初期，香港沿海一帶嘅海盜肆虐。1912年，駐守舊長洲警署嘅3名摩羅差被海盜殺死。一年之後，香港政府喺現址起咗一間保安比較嚴密，而且喺地理上擁有優勢嘅警署，用嚟防禦海盜嘅肆虐同襲擊。新嘅長洲警署樓高兩層，喺小山崗上面，居高臨下，形勢優越。該署一路用到而家，亦經歷過多次重組同翻新。

1960年代，長洲居民唔夠15,000人，因此罪案唔多，當時人員多數處理嘅係財物糾紛、家庭糾紛、喺颱風吹襲嘅時候懸掛香港熱帶氣旋警告信號，同埋擔任驗屍官，為長洲居民簽發死亡證。

建築

長洲警署設有報案中心、資源中心、當值室、會見室、羈留室同刑事偵緝部辦公室等設施。