英屬香港

香港 Hong Kong
直轄殖民地（1841–1941，1945–1981） 英國屬地（1981–1997）
新安縣|←   ←   ← 1841年－1941年 1945年－1997年 →   →
香港旗（1959年–1997年6月30號） 香港紋章（1959–1997）
口號 Dieu et mon droit（法文） 「我權天授」
國歌 《天佑吾皇/天佑女皇》
香港地圖（1975年）
首都或首府	赤柱 (1841年) 維多利亞城
常用語文	英語、粵語
政體	殖民地
英國君主
- 1841–1901	維多利亞（首）
- 1952–1997	伊利沙伯二世（末）
香港總督
- 1843–1844	砵甸乍（首）
- 1992–1997	彭定康（末）
香港輔政司/布政司
- 1843–1844	麻恭（首）
- 1993–1997	陳方安生（末）
立法機構	立法局
歷史
- 英軍佔領香港島	1841年1月26號
- 《南京條約》割讓香港島	1842年8月29號
- 《北京條約》割讓九龍	1860年10月24號
- 租借新界	1898年7月1號
- 日治時期	1941年12月25號－1945年8月15號
- 香港主權移交	1997年7月1號
通貨	港圓 (HKD) （1862年起）
而家屬於	中華人民共和國  香港特別行政區 廣東省深圳市（西九龍站內地口岸區同埋部分邊界海域）

英屬香港（英文：British Hong Kong）即英國統治之下嘅香港。佢對應香港英治時期，即1841年1月26號香港開埠，到1997年6月30號英軍撤出香港。當中有三年幾，1941年12月25號，到1945年8月15號，畀日本佔領，是爲香港日治時期。

香港一地，由英國得香港全境而定。英國人得到香港之前，香港地處邊陲，附於他境，不爲人所重視。香港之城，由英人所建，可謂香港開始。香港早年係英國殖民地，後尾轉爲英國屬土。

歷史

英國佔領香港之前，香港全境，爲大清新安縣地。新安縣官，同大清其他一樣，都唔係直接管治，而係靠鄉紳管。各鄉組約自衞，而稅收亦係鄉紳代收，一部份自用，一部份上繳。海上時有海賊紛擾，到各鄉搶畧，除咗官兵，就係鄉民自保。海上除咗有賊，亦有唔少水上人，藏居各灣，以漁爲業。

英國商人到大清通商，由來已久。大清承大明後期嘅封鎖政策，並不鼓勵貿易。本來有幾埠通商，變成得廣東省城，卽係廣州一埠通商。香港之地，喺廣州對外，商船入省必經之路，所以英船亦到過香港。香港一水之隔，係澳門，同爲省城對出，西洋人，卽葡萄牙人，租此定居。英商到大清做生意，通常灣泊澳門，亦會寄椗零丁山、長洲、南丫島、香港島等洋面。英商到各處通商，通常想乞求海島爲通商之所，所以早就相中香港島，其海水深，山有水源，係可造之埠。不過並無諸實行，不過各船亦時時灣泊。英國使臣去北京之時，亦途經香港逗留，補充糧水。

時到1839年，大清想阻止鴉片貿易。欽差大臣林則徐到省城，迫英商交出鴉片，不合作就不能保證其人身安全。駐華通商大臣義律，迫住同林則徐交渉，會交鴉片，但唔交人，而英商損失，由政府負擔。如此一來一往，就由英商嘅個人得失，化成英國事務。此後有林維喜案，林則徐要義律交兇手畀大清審，義律不從，自行按英律審案。林則徐就報復，就斷水斷糧，亦警告西洋人，唔准幫英國人，陷英人於絕境，迫其就犯。如此義律失英人安全有危險，必需請求英國派軍支援。義律將船撤向銅鑼灣。查實英商唔會咁易斷水斷糧，因爲大清貪污嚴重，而一向受歧視嘅水上人，亦會爲英人奔波。

英軍到臨與清軍開戰。省城清軍有所防避，英軍轉移北上，最後攻佔舟山定海。清延派琦善議和，出咗《穿鼻草約》，一款割香港島予英國。英軍隨卽喺1841年1月25號喺水坑口登岸，1月26號升起英國國旗。是爲香港史之始。但草約未得兩國君主核實。不過，英人已喺島北大興土木。由於條約未得批準，首次賣地喊冷告吹。英國撤義律，改由砵甸乍任駐華商務大臣。

清廷改派奕山到廣東作戰，英軍反擊，攻入省城。英軍承勝追擊，北上攻陷各城，去到江寧城下。清軍最後投降，清廷議和。1842年8月29號（道光二十二年七月廿四），雙方約咗《江寧條約》（即《南京條約》），香港正式落入英國手中。

香港旗（1959－1997年）

香港盾徽（1959－1997年）

早年

1841年1月25號喺水坑口登岸，1月26號升旗。香港就有由英國通商統領代爲管理，由駐省改爲駐香港，負責英國在華事務。當時就係義律管香港，1841年8月12號，佢就離任，由砵甸乍接任。由於喺戰事之中，總領有時會離港督戰，期間就由莊士敦代行。

1843年換約認，香港政府，由香港總督統治，兼任駐香港英國通商統領，呢個安排亦持續數任香港總督，由於香港事務日益繁忙，最後兩職分開。

1843年6月26號，砵甸乍就任香港總督，直至1844年5月8號。

日軍侵港

一九四一年十二月，佔據廣東嘅日軍，揮軍攻入香港，駐港英軍、皇家香港軍團、加拿大軍協力反抗，是爲香港之役。由於實力懸殊，香港不敵，香港總督楊慕琦向日軍投降。

睇埋

• 英國阻礙香港民主自治制度謠言

出面網頁

• 官方網站（存檔）
• 英屬香港嘅Facebook頁
• 《香港古地圖》 第一
• 《香港古地圖》 第二
• 《香港古地圖》 第三