駐港英軍

駐港英軍
存在時期	1841-1997
國家／地區	英屬香港
效忠	英國君主
部門	英國皇家海軍 英國陸軍 英國皇家空軍
種類	騎兵、步兵、炮兵、裝甲部隊
功能	領土防衛
規模	一個師（二戰時期） 一個旅（二戰後）
駐軍／總部	三軍司令官邸 (1841-1978)
裝備	裝甲車 掃雷艇 巡邏艦 直升機
參與戰役	登陸香港 香港保衛戰 雙十暴動 六七暴動 沙頭角槍戰
紀念日	香港重光紀念日
三軍總司令	香港總督
指揮官	駐港英軍司令
首任指揮官	德己立少將
末任指揮官	鄧守仁少將
著名指揮官	莫德庇少將 華里士准將 羅遜准將

駐港英軍（英文：British Forces Overseas Hong Kong）係大英帝國派駐到香港同負責香港防務嘅英國軍隊，由英國陸軍、皇家海軍同皇家空軍組成，自1841年香港開埠以嚟進駐香港，日本喺1941年12月發動太平洋戰爭後爆發嘅香港戰役係英軍駐港期間參與嘅最大規模戰鬥，喺二次大戰之後，駐港英軍除咗負擔香港邊境嘅防務之外，亦曾經喺1967年協助警方平息六七暴動，喺海上救援工作方面亦擔當重要角色，並經常支援邊界執法工作，包括堵截偷渡同走私等活動。1997年7月1號香港主權移交之後，駐港英軍喺香港超過一個半世紀嘅防衛任務至此結束，英軍全數撤離香港，中國人民解放軍駐香港部隊接管香港防務。

簡介

内文：香港軍事 § 歷史

香港保衛戰爆發之前，已經有香港華人喺駐港英軍裡面服役，張相裡面係配備電單車的華人傳令兵

當香港喺1841年開埠，當時登陸香港嘅英軍就成為咗第一批駐港英軍。早年駐港英軍嘅官兵大部份都係來自英國本土，而由於英國喺19世紀中葉嗰陣擁有唔少殖民地，所以都有嚟自呢啲殖民地嘅士兵駐守香港。

駐港英軍第一次招募華人入伍係喺1891年，當時「東方水雷炮營」(Eastern Battalion of Submarine Miners)成立，而喺香港亦都派咗一連兵。呢連士兵大部份都係本地嘅蜑家人（水上人），而當時呢啲水雷炮兵由英屬印度陸軍負責訓練，亦都採用英印軍嘅軍階。佢地嘅制服同當時嘅華人警察（俗稱大頭綠衣）一樣，亦都擁有一定嘅長期服役同退伍安排，所以吸引咗唔少人報考。但係呢支部隊喺日俄戰爭後就解散咗。

1918年一次大戰結束後，英國政府裡面已經有人將日本視為假想敵，而呢個諗法亦都喺1930年代引起英國政府重視，決定向香港派更加多嘅軍隊，同時喺醉酒灣附近起一條永久性防線去防禦香港。同時，亦都喺香港招募本地華人同歐裔居民，分別組成香港華人軍團同香港義勇防衛軍兩支部隊。所以喺香港保衛戰前夕，駐港英軍嘅兵力除咗有英軍之外，仲有英屬印度陸軍、增援香港英軍的加拿大陸軍以及由香港人組成嘅香港華人軍團同香港義勇防衛軍一齊保護香港。

1941年12月8號，日本陸軍發動南方作戰，喺偷襲珍珠港之後幾個鐘就入侵香港，孤立無援嘅駐港英軍面對喺人力物力上都佔有絕對優勢嘅日軍陷入苦戰。經過咗十八日嘅激戰，駐港英軍嘅防線已經全部被瓦解，而日軍更加喺12月25號聖誕節當日製造咗聖士提反書院大屠殺，又威脅攻入維多利亞城，迫使港督楊慕琦同駐港英軍司令莫德庇少將投降，香港淪陷。駐港英軍嘅官兵大部份唔係戰死就係被俘，好多被俘虜嘅駐港英軍官兵喺戰俘營內受到唔人道嘅待遇，更有人被帶到其他日本佔領地勞役致死。但係仍然有唔少華裔嘅駐港英軍士兵同義勇軍嘅成員成功逃離香港，並組成香港志願連去東南亞對抗日軍。亦都有唔少駐港英軍嘅官兵加入英軍服務團，喺香港或者其他日本佔領地做情報搜集。

1945年8月15號，日本宣佈無條件投降，而香港亦都喺8月31號重光。香港政府喺1946年將呢日定為香港重光紀念日，去紀念二次大戰盟軍嘅勝利同悼念喺香港保衛戰以及三年零八個月期間陣亡嘅軍人。1950年代隨住中國介入韓戰引起貿易禁運，中英關係緊張，政府又重新招募華人組成香港華人陸軍訓練隊，並喺1962年改組成為香港軍事服務團，成為駐港英軍喺本港招募嘅華人正規軍。喺1967年中共發動文化大革命之後，香港嘅防衛形勢又再度變得緊張，之後更發生六七暴動，駐港英軍亦都奉命平息參與暴動。

1970年代之後，香港局勢逐漸穩定，英軍喺香港嘅規模亦都開始縮細，加埋英屬印度已經喺1947年獨立，所以呢個時期駐港英國陸軍大部份由英國官兵同尼泊爾嚟嘅啹喀兵組成，華人就集中喺香港軍事服務團，至於海軍同空軍大部份都係被派過嚟嘅英國官兵。香港居民可以用本地招募人員（Local Enlisted Personnel, LEP）嘅身份加入陸軍嘅香港軍事服務團或者海軍嘅皇家海軍香港中隊，而身處英國嘅港人亦可以用英國國民（海外）護照喺英國本土投考英軍正規軍，但呢啲個案十分之罕見。

皇家香港軍團（Royal Hong Kong Regiment），又稱皇家香港軍團（義勇軍）（Royal Hong Kong Regiment (The Volunteers)），俗稱「香港義勇軍」，係英屬香港時期成立嘅一支本地皇家部隊（Crown Regiment），負責協助香港防衛、維持秩序同埋參與救災行動。

軍團最早喺1854年成立，1951年獲英王佐治六世授予「皇家」榮銜。由1960年代初開始，軍團同皇家裝甲兵團（Royal Armoured Corps）建立隸屬關係，並於1970年根據附屬規例（L.N. 190 of 1970）正式編入該兵團作戰序列，受駐港英軍司令（Commander British Forces Hong Kong）指揮。

軍官由香港總督（以三軍統帥身份）奉英女皇之名頒授委任狀，成員受《1955年陸軍法》（Army Act 1955）同《女王軍規》（Queen’s Regulations）約束。雖然軍團由香港政府提供經費同行政支援，但相關資金屬於「皇家收入」（Crown revenues），唔屬於地方民兵性質。

軍團由數名借調嘅正規英軍軍官擔任主要指揮及訓練職務，整體架構同訓練方式根據英軍標準，並參考本土防衛軍（Territorial Army）模式運作。成員多數係香港市民，嚟自唔同行業，須定期接受訓練同參與演習，喺緊急情況下動員返軍營報到，僱主需配合提供假期。

二次大戰之後，軍團成員大部分係香港本地華人。除咗陸軍嘅皇家香港軍團之外，當時香港仲有香港皇家海軍志願後備隊（Hong Kong Royal Naval Volunteer Reserve）同皇家香港輔助空軍（Royal Hong Kong Auxiliary Air Force），分別隸屬海軍同空軍系統。前者喺1967年解散，後者喺1993年改組為政府飛行服務隊，沿用至今。

1990年8月伊拉克入侵科威特，多國組成聯軍準備驅逐伊拉克軍隊。當時駐港英軍嘅200幾名啹喀兵亦喺1990年12月前往沙地阿拉伯，支援當地嘅英軍。

1997年7月1號香港主權移交之後，駐港英軍全面撤出香港返回英國，而香港嘅防務交由解放軍駐港部隊負責，駐守香港156年嘅駐港英軍亦都正式走入歷史。