祖漢尼斯·開普勒

出自維基百科,自由嘅百科全書
(由開普勒跳轉過嚟)
祖漢尼斯·開普勒

祖漢尼斯·開普勒德文Johannes Kepler1571年12月27號1630年11月15號)係德國天文學家數學家開普勒定律嘅發現者。

開普勒喺德國巴登-符騰堡州魏爾代施塔特(Weil der Stadt)出世,佢爸爸係一個傭兵,不過好早就遺棄佢哋兩仔乸;佢媽媽係一個治療師同草藥師,可惜小開普勒依然體弱多病。

開普勒喺土丙根大學攻讀哲學同神學。喺大學期間,佢接觸到哥白尼嘅新天體系,向麥斯特林(Michael Maestlin)學習天文學。佢喺學生辯論中辯護日心說,並且成為哥白尼學派嘅支持者。

開普勒喺1594年搬到奧地利嘅格拉茨,做任數學同天文學教師。喺呢個時期,佢出版咗好多天文曆書同預測書,令佢嘅聲譽喺占星術師界嘅地位更加提高。佢喺1596年出版咗《宇宙之謎》一書,探討天體運動同宇宙結構嘅問題,雖然有唔少謬誤,不過仍然得到麥斯特林同第谷嘅讚賞。

1600年,開普勒去咗布拉格做第谷嘅助手。一年後,第谷就死咗。開普勒整理第谷留低嘅大量星象觀測紀錄同天文學手稿去完成第谷嘅遺願,編製咗《魯道夫星表》(Tabulae Rudolphinae)。開普勒又利用嗰啲資料寫咗本《新天文學》,總結出兩條定律:橢圓定律等面積定律

1611年,開普勒改良咗伽利略望遠鏡,變成更方便觀察天象嘅「開普勒望遠鏡」,重喺佢本《論光學》(Dioptrice)寫低對光線折射嘅計算同火嘅成像原理。佢用簡單嘅數學方法代替以前複雜嘅模式得出週期定律,即係開普勒第三定律。

開普勒嘅著作《新天文學》、《宇宙和諧》同《哥白尼天文學大綱》對其他科學家,包括牛頓,有深遠影響,為佢哋嘅萬有引力理論奠定咗基礎。佢嘅研究-尤其係開普勒三大定律-廣泛而有影響力,令佢成為現代天文學、科學方法同自然科學嘅奠基人之一,而佢亦被人叫做「天空法律嘅制定人」。

參考[編輯]

  • Johannes Kepler 英文維基百科(英文)
  • Johannes Kepler Stanford Encyclopedia of Philosophy)(英文)
  • Johannes Kepler World History Encyclopedia](英文)
  • 《影響人類文明發展的100位科學家》 作者:羅堇文