開集

開集係拓撲學入面一個好基礎嘅概念，係歐幾里德空間入面嘅開集嘅推廣。簡單啲嚟講，開集嘅定義係將研究函數連續性最重要嘅部分抽咗出嚟。

開集同拓撲結構呢個概念好有關係，一個集合上面可以有好多種唔同嘅拓撲結構。喺一個集合 X 入面，我哋選取一系列佢嘅子集，呢啲集要符合三個性質：(1) 任何數量嘅呢啲集嘅聯集都要喺返呢個系列入面。(2) 有限個呢啲集嘅交集都要喺返呢個系列入面。(3) 空集同埋成個集 X 喺呢個系列入面。符合呢三個性質嘅集系列就叫 X 上面嘅一個拓撲結構 $\tau$，喺 $\tau$ 入面嘅集就叫一個開集。講開集一定要講你係用緊邊一個拓撲結構，因爲一個集可以喺一種拓撲入面喺開嘅，喺另一種拓撲入面就唔係。