關東地震

出自維基百科,自由嘅百科全書
地震之後嘅橫濱市區
地震之後嘅淺草凌雲閣

關東大地震係一場喺大正12年(1923年日本時間9月1號上晝11:58分發生喺日本關東平原地震災害,黎克特制7.9級,震央神奈川縣相模灣嘅伊豆大島。呢次地震摧毀咗東京同埋附近嘅港口橫濱、周圍嘅千葉縣神奈川縣同埋靜岡縣,喺成個關東地區造成廣泛破壞。

傷亡[編輯]

  • 死亡人數、失蹤人數:約14萬2千8百人(官方統計死亡者約105,000人)
  • 避難人數:最少1900萬人以上
  • 冧咗嘅樓:約128,266棟
  • 畀火燒咗嘅樓:約447,128棟

因為關東大地震發生喺中午,當時好多人咁啱開咗火煮飯,搞到好多地方都發生大火,增加死傷人數。喺地震發生嘅時候,日本北部能登半島附近沿海嘅颱風所帶嚟嘅強風,令到大火好快咁蔓延。好多人因為佢哋嘅腳棘住喺熔咗嘅瀝青路入面而遇難。而最大嘅單一傷亡災難就係發生喺陸軍本所被服廠跡地(依家嘅橫網町公園),當時大約38,000人湧咗入去東京市中心呢個空曠嘅空地,被後嚟引起嘅火災暴風燒死。地震搞到好多地下水管斷裂,令到救火工作相當困難,大火要到9月3號朝早先救熄。

地震後嘅動亂[編輯]

大地震引起好多民眾恐慌同混亂,搞到傳出好多謠言。有人話喺日本嘅朝鮮族利用災難嚟獲利,犯咗縱火同埋搶劫案,重收埋炸彈,於是好多市民覺得嬲。喺地震發生之後,喺東京同橫濱大約有6,600個韓國人畀人大規模屠殺。亦有一啲人又畀人當係韓國人,例如中國人沖繩人同埋一啲講區域性方言日本人,佢哋都遭受同樣嘅命運。大約有700個華人,其中大部分嚟自溫州畀人殺咗。溫州後來喺1993年起咗一座紀念碑紀念呢次屠殺。

362個日本人最後畀人告謀殺、蓄意謀殺、誤殺同埋襲擊。但係大多數人都畀人放咗,甚至嗰啲已經畀人送咗去監獄嘅人後來都因為昭和天皇結婚紀念受到赦免畀人放返。相反嘅係,喺呢段期間分別有兩個韓國人畀人告謀殺、三個韓國人畀人告縱火同埋六個韓國人畀人告搶劫。

地震後加速戰爭[編輯]

呢次大地震加速咗日本軍國主義喺國內嘅漫延,日本政府為咗擴大版圖,遷移人民,避開天然災害嘅威脅,加速用軍事手段打第二啲。最終喺十幾年之後嘅第二次世界大戰做咗軸心國之一,喺東亞地區建立咗大東亞共榮圈