阿

阿，讀柯/ɔː˥/，原本意思大土山，或者山坡，從阜字部，另一邊係可字。本意依家無人用。古文有用來起音，按韻會小補讀音屋，係入聲字。而廣東話，起音字就用亞字來寫。

近世學者，引入咗亞音/aː˧/，或者遷就北方話音，將亞音移入廣東話，或者復古切音，引入新讀音。如此做成讀音混亂。

義

古文阿字，初時講大土山，細嘅叫陵，大嘅叫阿。後尾引做坡，水邊。又引伸做屋頂。又有彎曲義，挨倚之義。

廣東話【可】字邊，都讀ɔː做韻母，可柯哥河苛訶歌屙婀軻珂痾舸牁牱，全部韻母一致。阿字都唔例外。

以此舊日書籍可以考證。一八五五年，初學粵音切要，只得/ɔː˥/音。一九一四年分部分音廣話九聲字宗，只得/ɔː˥/音^[1]。一九一六年，廣話國語一貫未定稿，只得/ŋɔː˥/音，即鼻音化/ɔː˥/音^[1]。一九四一年，道字典，只得/ɔː˥/音^[1]。

另一啲例證，如阿彌陀佛，就算由梵音Amida，阿仍然讀柯。以前新聞，阿富汗，阿仍然讀柯。劉備個仔阿斗，讀柯。阿房宮亦讀柯。剛正不阿，讀柯。外文例證，外國產品Ovaltine，香港叫做阿華田。

由此可見，廣東話阿字一直只得一音，讀柯/ɔː˥/。

而亞音/aː˧/係近世引入，並非廣東話讀法。引入亞/aː˧/音，要去到一九三九年。

一九三九年道漢字音，有兩音，/ɔː˥/音同/aː˧/。一九四一年，粵音韻彙，有四音，/ɔː˥/音，/aː˧/音，/aː˧˥/音，指名感歎詞，/aːk̚˧/音，指名阿誰，阿爺，同木蘭辭。由於粵音韻彙係第一本標咗萬國音標，之後字典只係抄佢讀音。

可見依啲附加音，係遷就北方話對應而設，或者讀書而設，而非廣東話本有。

清稗類鈔，經術類下，曾經寫到俗字之訓詁。

各地通行之俗字頗多，今略舉之。 ... 廣東人所用者如下：「亞」，音阿，阿俱寫作亞。... 廣西人所用者如下： ... 「亞」，音阿，阿字俱寫作亞，與廣東同。

由此可知，廣東廣西，起音字為亞，唔係阿。

亞字用於廣東人名，如梁亞榮（LEONG AH WING），如郭亞女事件，如蕭芳芳所演嘅林亞珍。

外來字丫音，譒為亞

寫亞係廣東話習慣。