Yahoo!知識+

出自維基百科,自由嘅百科全書
(由雅虎知識+跳轉過嚟)
Yahoo!知識+
Yahoo! Answers
網址answers.yahoo.com
商用?非商業性
網站類型協同合作
可用語言多國語言
現時狀態運作緊
香港版Yahoo!知識+嘅網頁
香港版Yahoo!知識+嘅網頁
Yahoo!奇摩知識+標誌
Yahoo!奇摩知識+標誌

Yahoo!知識+(中國叫雅虎知識堂,香港叫Yahoo!知識+,台灣叫Yahoo!奇摩知識+),英文系地區叫佢做Yahoo! Answers[1],係一個開放性嘅知識分享平台,畀啲用戶可以同網友做問答嘅互動,藉住各人嘅經驗同專長,喺問同答嘅討論之間,幫用戶搵出滿意嘅答案[2],同類似性質嘅Answers.comGoogle Answers(已經閂咗)、愛問知識人同埋百度知道可以稱之為競爭關係。用單純嘅問答系統嘅好處係可以唔需要喺唔同並且以分類為主嘅論壇時間搵答案,同喺關鍵字搜索入面嘅結果曬時間搵答案。無論係做乜嘢行動,都至少需要一個雅虎戶口,並且需要返自己嘅知識檔案。(喺香港,要評價要再手機認證)全球雅虎最早嘅知識+係由韓國響2003年6月設計嘅。Yahoo!知識+到而家為止已經喺至少19個地區建立咗。

知識服務係免費嘅會員服務。雖然係噉,但係英文版嘅Yahoo!知識+嘅發問次數仍然冇急升,反而有啲荒謬嘅問題出現。[3][4]事實上,Yahoo!因為廣納冇智慧財產權審核制度嘅知識問答文章而促成咗知識所屬雅虎搜尋引擎達到率(reach)大增。另外喺台灣,知識搜尋網甚至搶佔60%以上市佔率。到咗2013年5月29號,Yahoo!奇摩知識+嘅已解決問題數量已經超過二千零四十八萬六千條。

2021年,雅虎閂咗大部分知識+服務,而家得日文版重運作緊。

網站運作[編輯]

知識+可以分做四個部份,包括:「發問」、「回答」、「搜尋」同埋「發表」(回答可以分做一般知識、個人煩惱同埋快問快答,而發表亦可以分做一般嘅知識同一啲高檔啲嘅知識)[5]。到而家為止,用知識+係完全免費嘅,無論喺知識+入面問嘢、答問題同埋做分享知識(寫文章)都唔會收任何錢。只要嗰個用戶有雅虎嘅個人戶口,就可以用知識+呢一項服務[6]

知識+嘅運作係採取點數問答機制嘅,並以「預付+回饋」制來實行。當用戶發問嗰陣,嗰個用戶必須先畀五至二十點不等嘅點數,呢啲點數將由系統先行扣除並且幫你保管住先,等到嗰個發問者揀出最好嘅解答或者有咗投票結果之後,再將點數轉贈畀最佳解答者。畀住先嘅點數,因為會贈送畀最佳解答者,所以叫做「解答贈點」。高啲嘅解答贈點可以吸引多啲嘅網友來回答,用戶通常會自行依照問題嘅難易度、緊急度嚟畀點。當揀出最佳解答之後,如果評價好好,發問者同最佳解答者可以各自攞到10~100點嘅系統贈點,作為將問題轉換為知識嘅回饋[7]

發問者喺發問問題嗰陣可以選擇問題接受回答嘅日數,由1到10日不等。喺「問題分數」入便,用戶可以選擇將5、10、15、20分贈送畀「最佳 回答」者。發問完畢之後,贈送嘅分數會即刻喺發問者嘅知識分數入面扣除。如果問題嘅發問時間就快到但係仍然冇滿意嘅回答出現,用戶可以選擇「延長發問」,發問時間將再延長5日。每個問題淨係可以延長發問1次,唔使另扣點數[8]

喺一個禮拜完咗之後,系統會喺某一個類入面以最多「最佳解答」數嚟揀出嗰個類嘅「本週分類高手」,所以一個人可以做好多唔同類嘅分類高手。

各種語言版本一覽[編輯]

國家/地區 名稱 成立日期 網址
韓國 Yahoo!지식검색
Yahoo!知識檢索
2003年6月 http://kr.ks.yahoo.com/
日本 Yahoo!知恵袋 2004年5月 http://chiebukuro.yahoo.co.jp/
台灣 Yahoo!奇摩知識+ 2004年11月18號 http://tw.knowledge.yahoo.com/
美國 Yahoo! Answers 2005年12月7號 http://answers.yahoo.com/ 佢嘅用途係取代舊版嘅Ask Yahoo(最終喺2006年3月全面閂晒[9]
中國 雅虎知识堂 2005年12月11號 http://ks.cn.yahoo.com/
香港 Yahoo!知識+ 2006年2月1號 http://hk.knowledge.yahoo.com
法國 Yahoo! Questions réponses http://fr.answers.yahoo.com/
德國 Yahoo! Clever http://de.answers.yahoo.com/
西班牙西語系 Yahoo! Respuestas http://es.answers.yahoo.com/
巴西葡語系 Yahoo! Respostas http://br.answers.yahoo.com/
越南 Yahoo! Hỏi & Đáp 2007年6月19號[10] http://vn.answers.yahoo.com
  • 2005年10月,中國雅虎俾阿里巴巴集團全資收購。2013年9月1號,中國雅虎關閉門戶業務,雅虎知識堂亦隨之停止服務[11]
  • 2021年4月雅虎香港宣佈由4月20號開始唔可以再問新問題,網站會由同年5月4號開始停止服務。

合併[編輯]

2008年12月15號,香港知識+同台灣(奇摩)知識+嘅戶口進行合併,合併之後香港同台灣嘅用戶淨係需要使用一個Yahoo! ID,就可以同時參與香港同台灣知識+,方便各用戶進行知識交流[12]。喺革新咗之後,台灣知識+嘅問題同埋知識亦有機會喺香港知識+入面顯示,相對亦一樣。以香港用戶為例,由香港保留戶口所發問嘅問題同埋知識將會優先顯示喺香港知識+入面。如果用戶係選擇保留香港戶口,呢個用戶所發問嘅問題將會喺香港知識+入面獲得優先顯示,但係喺台灣知識+入面嘅顯示次序就會較後。而用戶喺知識+入面搜查資料嗰陣亦一樣,由該地區戶口問嘅問題或知識嘅顯示次序將會較前,即香港知識+會以香港問題同埋知識為先,相反亦然[13]

用戶等級[編輯]

喺每一個語言版本嘅Yahoo!知識+入面,系統都會以點數數量、答問題數量等等嚟將「用戶」分做幾個「等級」,而喺「等級」入面,又分做五個「級仔」(「知識長」除外),而雅虎亦會間唔鐘做下革新咁。以香港版本Yahoo!知識+為例,系統就會分做[14]

  • 知識長
  • 博士級
  • 碩士級
  • 大學級
  • 中學級
  • 小學級
  • 幼兒級
  • 匿名(未啟用知識檔案)

服務衍生嘅問題[編輯]

  • 相同或者類似嘅問題成日被網友一而再,再而三咁提問,而答案亦唔會隨時代嘅改變而有所差異,無形中浪費好多網絡資源。
  • 答案嘅正確性冇設置檢核機制,錯嘅答案成日被重複轉貼,啱嘅答案就成日被忽視,亦都無設置糾正機制以修正人哋錯嘅答案。
  • 問答嘅資料庫雖然龐大並且富含各種資訊,卻無系統性嘅整理,好似喺貨倉入面堆滿各種貨物,卻因擺放方式雜亂無章,而無法方便使用。
  • 因為無有效嘅管理同規範,導致商業廣告氾濫,但雅虎方面淨係進行扣點處分,冇有效嘅阻嚇作用。

睇埋[編輯]

參攷[編輯]

  1. "Yahoo! Answers". 原著喺2005年12月10號歸檔. 喺2014年4月5號搵到.
  2. 雅虎香港知識+說明 甚麼是知識+
  3. Raphael, J. R. (December 17, 2009). "The 20 Dumbest Questions on Yahoo Answers". PC World. 原著喺2012年8月28號歸檔. 喺May 24, 2010搵到.
  4. Ahmed, Murad (January 3, 2009). "Ask a silly question..." The Times. London. 喺May 24, 2010搵到.
  5. 知識+說明 如何使用知識+?
  6. 知識+說明
  7. 知識+說明 我想發問
  8. Yahoo!奇摩服務中心>知識+說明 可以延長發問天數嗎?
  9. Schwartz, Barry (December 13, 2006). "Yahoo Answers Birthday: One Year Old". Search Engine Land. 喺August 22, 2012搵到.
  10. Thu Hiền. Yahoo! tăng tốc tại Việt Nam[失咗效嘅鏈]. Ngày 25 tháng 10 năm 2007 [Ngày 27 tháng 8 năm 2013].
  11. . 原著喺2014年1月28號歸檔. 喺2014年4月5號搵到.
  12. 雅虎香港知識+說明 什麼是知識+戶口合併?
  13. 香港及台灣知識+問題及知識同樣合併嗎?
  14. . 原著喺2013-07-10歸檔. 喺2014-05-13搵到.

出面網頁[編輯]