集幣

集幣，粵拼：zaap6 bai6，或者叫儲銀仔，顧名思義就係指緊人收集各種嘅銀仔，廣義上仲可以包埋收集銀紙等非銀仔型嘅法定貨幣。集幣可以係純嗜好，但亦可以係儲嚟預咗攞去炒賣嘅。有玩開集幣嘅人，實會收集一啲限量版或者有紀念價值嘅金幣或者銀幣，佢哋往往仲會好擏惜自己啲收藏品，務求想自己啲收藏品保持住喺最佳狀態。

有歷史意義嘅金幣可以好有價值：有唔少金幣都有特製嘅圖案，紀念緊某啲歷史大事或者人物，賣走手上嘅紀念金幣嗰陣好多時都賺大錢—佢哋嗰個賣價，同熔咗個金幣啲金值嗰個價，可以高成嘅 1.8 倍咁多^[1]；而根據紀錄，喺二零二一年嘅美國，有人攞咗一個出自一九三三年嘅雙鷹幣去拍賣，最後以 1,890 萬美金嘅價成交，成為當時全美國最值錢嘅金幣^[2]。