雲香酒樓

出自維基百科,自由嘅百科全書

雲香酒樓係一間原先喺廣東省廣州市城東開嘅老牌酒樓,又名雲香樓,喺清光緒三十年(1904)開業,由吉祥堂鄭雲卓揸莊,8人參股投資,5000兩銀為開業資本。初名雲香茶樓,開業嗰時係磚木結構瓦面二層樓,主營茶市同糕餅,以製作龍鳳禮餅、中秋月餅而出名,時有「西有蓮香,東有雲香」之美譽。民國18年(1929)前鑒街(而家東華東路)開馬路,雲香茶樓重新拆建成三層樓房,呈嶺南建築風格[1]

1956年改成公私合營,同年將鄰近嘅聚英、喜寶茶樓員工拼入雲香茶樓。1958年投資480萬,全面裝修改造茶樓,更新設備,擴建咗四樓同三樓(三樓食街),改名雲香酒樓[2]

雲香樓同西關榮華樓一樣,曾經係粵劇曲藝戲迷聚腳處,每日下晝曲藝團會喺雲香樓准點開鑼,不過聚會喺2007到2008年間中斷。出品有雲香顯貴雞、片皮鵝同冰花蛋散(曾為廣州名菜美點獲獎美食),深受顧客讚許。1994年雲香酒樓進入廣州市飲食服務企業十強之列。1998年,酒樓實行股份合作制經營。未結業前嘅雲香酒樓,原係廣州千禧年後尚存嘅最老四間茶樓之一(另外三間係榮華樓、陶陶居蓮香樓)。2011年廣州市公佈嘅第三批老字號名單中有雲香酒樓。2015年3月,雲香酒樓相信由於股權分配等問題,對外宣布結業[3]

參考[編輯]

  1. 飘云外 誉满百年. 廣州文史. 原著喺2020年3月28號歸檔.
  2. . 廣州: 廣東人民出版社. 1999. p. 538. ISBN 7-218-03140-4.
  3. 广州111岁云香酒楼关门谢客 百年餐饮老字号成历史. 羊城晚报. 2015-03-10. 原著喺2017-11-07歸檔.