電磁感應

電磁感應，英文：electromagnetic induction，係指磁場改變令入面嘅電導體產生電動勢嘅現象。呢個電動勢叫做感應電動勢或者感生電動勢，如果呢個電導體形成咗閉合電路，咁呢個電動勢就會令啲電子郁，形成感應電流（感生電流）。

英國物理學家米高·法拉第一般被認為係喺1831年發現感應現象嘅人。

基礎概念

睇埋：磁場同電流

電磁感應係指磁場改變會引起電動勢。想像以下嘅實驗：製作電路，左邊有電源，並且有啲電線繑住一個用鐵造嘅圈，而右邊又係噉繑，同時右邊有個安培計；實驗結果發現，研究者撳掣嘅時候，左邊嘅電路有電流，起電流嗰刻右手邊嘅安培計會度到電流；當研究者又撳掣，電流消失嗰一刻，右邊嘅安培計又會度到電流。呢種實驗展示咗電磁感應：根據必歐沙伐定律，電流存在會產生磁場，所以喺開電嗰一刻，鐵圈內會突然出現磁場，而電磁感應則係指，磁場相對於個線圈嘅變化會引致線圈出現電流，即係引致右邊電線喺開電嗰一刻—鐵圈突然有磁場—同埋閂電嗰一刻—鐵圈磁場突然消失—嗰陣會有電流出現。

數學模型

電磁感應可以用法拉第電磁感應定律描述：

$\nabla \times \mathbf {E} =-{\frac {\partial \mathbf {B} }{\partial t}}$；

好簡化噉講嘅話，呢條式意思就係「當一個空間有磁場改變（${\partial \mathbf {B} }/{\partial t}$）嗰陣，就會產生電場（$\mathbf {E}$）」。順帶一提，火牛就係用咗呢種原理，令彼此之間唔直接相連嘅交流電路能夠透過電磁感應嘅方法引致對方出現電流。

睇埋

• 經典電磁學

參考

篇文用咗嘅行話或者專有名詞，外語版本如下：

篇文引用咗以下呢啲文獻同網頁：