非常律師禹英禑

《非常律師禹英禑》（英文：Extraordinary Attorney Woo）係韓國ENA喺2022年6月29號到8月18號期間播出嘅水木電視劇，每逢週三、四晚間九點首播，Netflix緊貼韓國喺海外同一日更新。由《浪漫醫生金師傅》系列導演劉仁植同埋電影《證人》嘅編劇文智媛合作打造，朴恩斌、姜泰伍、姜基榮主演。劇情描述擁有天才頭腦但患有自閉症譜系嘅禹英禑，通過解決唔同類型案件，成為一位真正嘅律師，而上演嘅大型律師事務所生存記。

呢齣劇創造咗ENA頻道最高收視紀錄，蟬聯幾個禮拜話題性第一名，被媒體稱作「禹英禑症候群」。結局當週登上Netflix全球收視冠軍，以4億小時嘅總觀看時數，位居嗰陣時非英語電視節目第6名。事關呢齣劇集觸及到疾病、LGBTQ、脫北者與勞工等社會議題，而受到媒體、評論家、法律界同埋醫學界的好評，但亦都引起咗部分發展障礙者家屬嘅憂慮，感情線亦得到正反兩極嘅評價。

朴恩斌飾演自閉症人士嘅演技，得到媒體同觀眾嘅讚賞，並獲得第59屆百想藝術大獎TV部門大賞。姜泰伍、姜基榮等一眾演員，喺播出期間亦都受到好多關注。呢齣劇集除咗入圍10項百想藝術大獎，仲獲得咗評論家選擇協會、亞洲內容大獎、韓國電視劇節、APAN Star Awards等等嘅獎項。製作公司喺2022年8月宣布，預計將會喺2024年推出第2季。