顏成坤家族
顏成坤家族係香港嘅家族之一，中華汽車（中巴）係佢哋嘅家族事業。
家族史
[編輯]顏成坤祖籍廣東潮陽，喺香港出世。老豆顏永祠本身係九龍倉嘅咕喱頭，後來自立門戶，喺九龍做人力車生意，不過喺顏成坤細個就已經死咗。人力車生意授權顏永祠嘅兄弟顏六去做。到顏成坤成年之後，阿媽詹氏將本來授權畀叔伯顏六嘅人力車生意收返，交畀顏成坤打理。
喺1923年，顏成坤同黃耀南一齊成立中華汽車，想喺新興起嘅巴士市場分一杯羹。佢哋最初喺九龍區經營，對手有後來都攞到專營權嘅九巴同埋啟德客車公司。1927年，顏成坤同黃耀南個妹黃亦梅結婚，兩家嘅關係更加緊密。到1932年，港府宣佈將巴士行業引入專營權制度，中巴攞到港島區嘅專營權，九巴就攞到九龍同新界嘅專營權。顏氏嘅經營陣地就由九龍搬咗去港島。
後來到1942年，日本開始佔領香港，顏成坤畀當時日治政府委任做華民各界協議會委員。到1943年尾，顏成坤就詐病辭職，之後搬去澳門直至1945年二戰打完為止。
由於中巴嘅生意有專營權保護，即係獨市生意，所以盈利一直唔係問題。除咗中巴呢盤生意，顏成坤又有參股銀行同做其他公司嘅董事長，又有參與體育事務。1951年，顏成坤又入咗立法局做議員。1959年更加升做首席非官守議員去到1961年。
但係中巴一成不變嘅管理手法，加上時代嘅進步，佢嘅服務水平漸漸為人垢病，唔單止市民，就連政府官員都批評中巴質素跟唔上時代。到1993年，政府將原本係中巴嘅26條巴士路線嘅專營權批畀城巴，對中巴做成一定打擊。
之後，年過90嘅顏成坤先至退休。生意交畀三個仔女—顏潔齡、顏傑強、顏亨利打理。三個人入面，大女係律師，二仔係機械工程師，而三仔就係醫生。本身顏成坤係扶植顏傑強繼承，佢試過做到副監理，但後嚟佢畀廉署告佢用高價同中巴入車胎去收佣金，雖然最後告唔入，但係顏成坤就開始改為重用個女。顏家第二代都無心經營巴士生意，顏傑強更加話過巴士係「邋遢生意」，另外顏成坤「慳儉」嘅性格亦都傳承曬畀大女顏潔齡，佢曾經試過用隔夜西餅招呼官員聞名。由於中巴到1990年代經營問題仍然存在，而且改革速度慢，勞資關係又好差，顏氏姊弟無心做巴士呢一瓣生意就連街外人都知。1998年，中巴嘅專營權畀政府收返，最後由新世界第一巴士投到。
喺1990年代之後，中巴開始發展地產業務，主要係將旗下嘅巴士廠房同員工宿舍重建，收入重比當時主業公共運輸多好多，呢啲地方後來發展做港運城同港濤軒等。
家族關係方面，顏氏三姊弟關係並唔算好，平時以「顏醫生」、「顏律師」稱呼，但係對守住家族產業方面，就相對團結，三個人都表示會企喺同一陣線。
2019年，大家姐顏潔齡因為年事已高，將中巴主席嘅位交畀細佬顏亨利。到2020年，顏傑強過身。2022年10月，顏潔齡嘅老公亦都過咗身。