香海慈航
.jpg)
.jpg)
香海慈航係香港一間寺院，喺荃灣老圍村三疊潭。因佢嘅外形似一艘漁船，而且起喺三疊潭旁邊，喺雨季嘅時候，石澗流水淙淙，所以亦叫做「船廟」。
「香海慈航」裏面主要供奉觀世音菩薩。喺佛教嘅經典之中，觀世音菩薩為咗普渡眾生，倒駕慈航。「香海」喺佛教嘅經典中係指圍繞須彌山嘅內海，全部都係香水，亦可泛指佛門。
香海慈航喺1960年起，原本前身名叫「觀音岩」。聽講由老圍村嘅村民仿照南中國海嘅漁船造型而自行設計起嘅，有啲建材更係三疊潭嘅石塊。得悉香海慈航原本係呂祖嘅道場，寬宗法師曾經同道教嘅友人扶乩，獲呂祖指派做住持。
香海慈航嘅船頭豎立咗關公像作為護法，前艙係虛雲禪師紀念堂，中間船艙係開山祖寬宗大師紀念堂，後艙係供奉千手千眼觀世音菩薩同地藏菩薩嘅圓通寶殿，船尾則有白衣觀音立像。喺寬宗大師紀念堂上面，係供奉呂祖嘅「呂祖飛真應化壇」。呂祖係著名嘅道教仙人，佢係八仙之一。壇裏面中央掛住「明鏡非臺」嘅橫匾。明鏡非臺四字係出自禪宗六祖惠能嘅禪悟偈語：「菩提本無樹，明鏡亦非台，本來無一物，何處惹塵埃。」。
除此之外，香海慈航嘅西面設有一條「雲連橋」，跨過三疊潭而連接到對岸。東面就有一座細细嘅寺廟「潮音淨院」，正門就面對山下面上葵涌一帶。寺嘅外面有一個葫蘆形嘅水池，旁邊嘅土地廟上面寫住「公公十分公道 婆婆一片婆心」。