香港仔大道

香港仔大道，近加油站

香港仔大道，香港一道，行經香港仔市中心。叫佢大道，皆因佢舊時主路，沿住石排灣舊岸，出入香港仔。後尾起咗香港仔海傍道，貫通東西大條新路，唔入市中心就少行。海傍道起，海傍道止。中間向北曲咗入去，東面同海傍道貼住平排，當中有段全無分隔，至終匯入海傍道。呢一曲，西面原本包住林蒙船塢，即之後香港仔夏圃船塢，再之後拆咗變香港仔中心。東面就石排灣聚落，即舊大街嗰邊。

語源

香港仔大道英文Aberdeen Main Road。意思香港仔通去其他地方主路。

史

香港仔大道可謂裙帶路尾，香港開埠前就有。至先聚落叫石排灣，今日舊大街。而東面直路，後起成市叫香港街。英人統治無耐，就開咗舊香島道，包括今日香港仔啲路。一九六一年，香島道分拆成八段命名，即柴灣道、大潭道、赤柱峽道、淺水灣道、香島道、黃竹坑道、香港仔大道、石排灣道。香港仔一段命名為香港仔大道。同年十一月廿三號，香港仔大道擴闊完成。而舊時香港仔大道更加長，西面到牛奶公司倉庫，東面到明渠。

一九八五年香港仔海傍道通車，香港仔魚類批發市場一段，併入香港仔海傍道，而十五間一段就保留。

路徑

以湖南街做分界，街北就雙程路，街南東行就單程路。行分段順住來講就咁。

• 西起海傍道，香港仔魚類批發市場對出。
• 東北行到奉天街，奉天街喺東面。呢段西北工廠大廈，東南利群商場。
• 屈北到香港仔華人永遠墳場。西面工廠大廈，東面香港仔中心。
• 過墳場成彎位，向東偏南到成都道，成都道喺南面。北面聖伯多祿中學，過啲永發商業大廈同幾棟唐樓。南面香港仔中心。
• 繼續直行到東勝道，東勝道橫過大道。北面裕輝商業中心、香港仔渣打銀行大廈、唐樓。南面珍寶商場、香港仔大樓。
• 繼續直行到街口稍彎南，東北駁香港仔水塘道、西駁洛陽街。北面香島大廈、港基大廈、香港仔天后古廟。南面中國石油油站。
• 轉南成分隔車道，分成南北行道。
  • 北行道
    • 到西安街，街喺西便。西面唐樓。
    • 到湖北街，街喺西便。西面金豐大廈同多層停車場。東便匯入天橋車流，來自海傍道西行。
    • 到湖南街，街喺西便。西面海波大樓、安泰大廈。而北行道到此為止。過湖南街就有香港仔巴士總站。
  • 南行道
    • 到香港仔舊大街，大街喺西便。東面嘉諾撒培德學校。
    • 到漁暉道，道喺東便。東面海滙大廈同唐樓。
    • 到無名街，街喺東便。東面宏興大廈、利發大廈、唐樓。東面近宏興大廈，車有分道上天橋出海傍道西行。
    • 向東南彎，北駁香港仔舊大街，西駁香港仔巴士總站出口。
    • 續彎。北面香港仔舊大街休憩花園。
    • 續彎。上蒲窩青少年中心山路。
    • 續彎。北面香港仔大石角休憩花園。
    • 彎盡東行到嘉寧大廈。匯合海旁道東行，留行車綫一行，無所分隔。之後再成分隔車道，同海旁道分開。
    • 到建輝大廈。行車道駁入海旁道東行。
    • 到景惠花園，行人路完。中間有香港仔大道公廁。前面車路上鴨脷洲大橋。

附近

• 香港仔中心
• 香港仔水塘
• 香港仔海濱公園