香港各大學打壓學生會爭議

喺2021-2022年，香港多間大學嘅學生會，都因為北京未經諮詢或香港人同意而強行落實嘅《香港國安法》，加上校方唔同程度嘅配合，宣布解散。另外，好多大學亦將民主牆圍封，有啲意見就批評，大學高層咁做係打壓言論自由。

各校情況

香港大學

香港大學學生會評議會喺7月7號通過悼念「七一刺警案」涉案人士梁健輝嘅議案，之後就引嚟政府同親中組織狙擊，之後學生會成員喺受壓後被迫宣佈集體總辭。

不過，香港大學高層並無因為咁放過學生會。喺2021年7月13號，香港大學學生會唔再被香港大學承認作為代表香港大學學生嘅組織，之後去到15號香港大學更加要求學生會遷出大樓，又拆走喺民主牆同學生會大樓和平表達意見嘅標語，其後仲協助香港警察國安處對學生會進行搜查。

香港中文大學

2021 年，新一屆香港中文大學學生會幹事會「朔夜」當選後即被校方「封殺」，包括暫停為學生會代收會費、暫停場地支援等。結果，佢哋上任僅僅一日之後，就被逼總辭。

喺2021年11月4號，中大嘅畢業典禮日，中大多處出現標語抗議校方接管學生會同埋要求其他學生組織向校方登記事宜，標語包括「還我學生自治」、「員生共治，必先共議」、「OSA（被刪去）．屬系會．入臨政」等，但呢啲和平表達意見嘅標語，亦好快就被中大校方拆走。

香港城市大學

喺2022年初，城大校方聲稱學生會無交審計報告，喺2月8號宣布收回會址。當時學生會批評「校方漠視學生權益，繼而進行校內打壓」。最終學生會喺2月14號遷出，並舉行告別禮。佢哋當日由學生會會址出發，步行Cut Price（學生會嘅優惠店）門前以毛筆寫下「思想自由 學術自主 寸步不讓 抗爭到底」十六隻大字，再步行到城大民主牆同民主女神像為終站。城大學生會會長劉浚傑又慨嘆，時代已經唔再容許任何學生會存在。雖然現場學生多數都有戴好口罩，但和平嘅儀式，仍然被城大設施管理處嘅人以防疫問題為由打壓。

香港教育大學

2022年1月，教大管理層向全體師生發電郵，宣布唔再承認學生會地位。指學生會多年來存在管治問題，加上已連續4年以臨時行政委員會形式運作，未獲學生授權，缺乏代表性。

學生會會長楊逸銘表示學生會一直根據既有章則、程序進行選舉及委任幹事，而教大學生都可以成為學生會會員，強調學生會並無剝奪任何學生成為基本會員嘅資格。佢又話，學生會近年致力改善管治方式，增加透明度，包括設立網頁、社交媒體帳號、設置告示板、張貼會務資訊等，質疑校方如果覺得學生會存有管治問題，點解唔向佢哋提出。

同年2月，有超過十五分之一學生會會員根據會章要求召開全民投票決定學生會未來。但後來大學學生事務處處長甄玉媚發出通告指舉行全民投票，違反大學決定，因此命令停止全民投票，學生商討過後，已停止全民投票。

外間評論

香港大學當時嘅決定，當時被部份學生批評，有校方學生咁做係向學生宣戰，漠視學生嘅民意代表，而且對於學校唔保護學生感到痛心。

睇埋

• 香港國安法對高等教育界嘅影響