香港理工大學

香港理工大學
The Hong Kong Polytechnic University
校訓	開物成務，勵學利民 To learn and to apply, for the benefit of mankind
開辦	1937年
類型	公立大學
校長	滕錦光教授
副校長	陳正豪教授（常務及學務副校長） 楊偉雄先生（行政副校長） 衞炳江教授（科研發展） 阮曾媛琪教授（學院發展及合作） 陳智軒教授（學與教） 石丹理教授（本科生課程） 22.304165°N 114.179106°E / 22.304165; 114.179106
教師	1,187
學生	32,427（2012/2013年度）
舊名	香港官立高級工業學院（1937年） 香港工業專門學院（1947年） 香港理工學院（1972年）
代表色	理大紅      理大灰
網站	www.polyu.edu.hk

香港理工大學（簡稱理大，又叫理工；英文：The Hong Kong Polytechnic University）座落喺香港九龍紅磡暢運道同康莊道交界，鄰近紅磡海底隧道同港鐵紅磡站。面積約9.35萬平方米，約有二萬八千多名全日制同兼讀制學生。

該校側重於應用研究，以培訓專業人士為己任，有別於九十年代前兩間綜合型大學（香港大學同埋香港中文大學）。亦由於理大前身係香港理工學院，所以老一輩嘅香港人都叫佢做理工。

歷史

香港理工大學前身係香港官立高級工業學院，喺1937年成立，舊址喺灣仔活道。喺1947年，改名做香港工業專門學院（1970年代亦叫「香港工業學院」），提供全日制同埋兼讀課程。1957年，學院搬咗去紅磡現址。

1972年8月1日，香港理工學院成立，開辦技術同埋實用科目嘅文憑同埋高級文憑課程。為當時嘅中學畢業生，提供升讀兩間主流大學以外嘅出路。香港理工學院係香港唯一一間理工，直至到1984年成立香港城市理工學院。

1994年11月25日，「香港理工學院」正式升格為「香港理工大學」，成為香港第四間大學。1999年7月，成立專業進修學院（The School of Professional Education and Executive Development，SPEED），畀大人報讀專業進修課程。2000年8月，成立香港網上學府（HKCyberU），係香港第一間網上學府，提供遙距嘅網上學習課程。2002年，成立香港專上學院（The Hong Kong Community College，HKCC），9月開始辦副學士課程。

2004年1月開始第七期同埋第八期嘅校園發展計劃。2005年9月第七期發展計劃大部份已完工及開始可以用Y座，並喺2006年4月出售命名權，命名做「李兆基樓」。

2019年11月17至18號，香港反修例運動期間，差人圍攻理工大學，實彈鎮壓學生同市民，史稱「理大浴血保衛戰」。

未來發展

• 理大已獲政府撥出位於前紅磡火車站嘅地以進行第八期校舍發展計劃。
• 教職員宿舍「百粹苑」已經拆咗，原址起一座四星級，用嚟出租嘅教學酒店。校長喺2005年10月4號話新嘅教學酒店大樓預計要用5億港元起，於2008年5月完成地基工程，將於2010年後落成。佢亦話呢間酒店將會為修讀酒店管理嘅學生提供實習地方，重會用作出租、研究、辦公室同埋教學用途。
• 第二座學生宿舍會喺何文田山谷道邨重建項目第三期起，同校園大概有20-30分鐘步程，預計2012年落成，提供1650個宿位。
• 專畀設計學院使用嘅「創新樓」（Innovation Tower）起緊，位於現時X座附近，樓高12層。大樓由著名建築師薩哈·哈帝（Zaha Hadid）設計，預計2011年落成。
• 香港專上學院及專業進修學院於2007年起，已經搬去理工學生宿舍附近嘅紅磡灣校舍以及西九龍校舍（只畀工商業副學士及專業進修學院銜接學士課程用）。

瑣事

2002年10月2號有11,273位大學嘅師生、校友喺香港大球場一齊打破當時嘅健力士世界人浪彩虹紀錄。咁樣做除咗係為慶祝學校65週年，重為兒童癌症基金會同香港耆康老人福利會籌款。呢個紀錄後來喺2004年俾菲律賓理工大學破咗。

收生成績計算方法

理大嘅成績計算方法以香港高級程度會考為主線，其中A=5、B=4、C=3、D=2、E=1，而高級補充程度（ASL）嘅科目就要乘返0.6。例如，十三分嘅組合可以係中化同埋英語運用B，其他三科高級程度科目係CCD，而九分嘅組合可以係中化同埋英語運用C同D，其他三科高級程度科目係CDE。當然重可以有好多其他組合。

教學方向

香港理工大學辦學以實用性為原則，所以開辦課程嘅首要條件係學到嘅嘢可以應用落去工作入面，並且對社會作出貢獻。故此，佢開辦咗一啲比較實用嘅課程，好似設計同埋紡織及製衣等非學術型嘅科目，而且重係獨市課程。而其他比較着重應用嘅行業，好似酒店管理同埋護理學咁，收生成績更可以同其他排名比較高嘅本地大學，例如香港中文大學，有得揮。

教學單位

• 應用科學及紡織學院
  • 應用生物及化學科技學系
  • 應用數學系
  • 應用物理學系
  • 紡織及製衣學系
• 工商管理學院
  • 工商管理研究院
  • 會計及金融學院
  • 物流及航運學系
  • 管理及市場學系
• 建設及環境學院
  • 建築及房地產學系
  • 屋宇設備工程學系
  • 土木及結構工程學系
  • 土地測量及地理資訊學系
• 工程學院
  • 電子計算學系
  • 電機工程學系
  • 電子及資訊工程學系
  • 工業及系統工程學系
  • 機械工程學系
  • 航空工程跨領域學部
• 醫療及社會科學院
  • 應用社會科學系
  • 醫療科技及資訊學系
  • 康復治療科學系
  • 護理學院
  • 眼科視光學院
• 人文學院
  • 中文及雙語學系
  • 中國文化學系
  • 英文系
  • 英語教學中心
  • 通識教育中心
• 設計學院
• 酒店及旅遊業管理學院

舊生

• 香港特首梁振英
• 電影導演王家衛
• 樂隊Beyond成員黃貫中
• 歌手梁詠琪
• 香港立法會議員陳婉嫻
• 香港立法會議員陳鑑林
• 麥嘜原作者麥家碧
• 國際動畫設計師許誠毅
• 2005年度香港小姐冠軍葉翠翠
• 香港商業電台DJ阮小儀
• 香港商業電台DJ甄子康
• 大快活快餐集團市場推廣部經理鄭嘉揚
• 時裝設計師及專欄作家鄧達智
• I.T時裝集團採購部副經理施俊偉
• 南方民主同盟主席龍緯汶
• 香港跳唱組合Hotcha成員張紋嘉Crystal

參考

報章

• 理大拆教職員宿舍 5億建教學酒店08落成 - 明報 2005年10月5日

出面網頁

• 香港理工大學
• 從人造衛星觀看該地點
• 建校65週年人浪彩虹的相片
• 香港理工大學 傑出校友
• 理大精研（理工大學附屬公司）
• 香港理工大學Youtube頻道